Fréttir

21. ágúst. Kaldbakur - Skersgnípa,6 tinda ferð
Ekið verður að Grenivík og bílum lagt norðan við Grenjá. Gengið upp með Grenjárgili og hefðbundin leið upp á Kaldbak. Haldið er svo áfram í norður og komið við á Útburðarskálahnjúki, ónefndum tindi, Svínárhnjúki, Þernu og Skersgnýpu. Gengið verður svo niður Ausugil og Látraströndin gengin til baka að bílum. Um 25 km leið fyrir vana fjallafara og ólofthrædda.

Vígsla nýja skálavarðarhússins í Laugafelli og sviðamessa verður haldin 11. september. Boðskort verða send þegar nær dregur.
- Stjórnin

Þeir sem eru haldnir valkvíða munu eiga erfitt með að ákveða sig næstu helgi því úr nógu er að taka. Frá föstudegi 13. ágúst til sunnudagsins 15. ágúst er í boði jeppaleiðangur um Austuröræfi . Á laugardeginum er um 30 km ganga upp á Mælifellshnjúk í Djúpadal upp Þverdal og niður Hvassafellsdal. Á sunnudeginum 15. ágúst er svo skemmtileg ganga á Uppsalahnjúk ofan Freyvangs í Eyjafirði, en af Uppsalahnjúk er gífurlega fallegt útsýni yfir Eyjafjörð.

Komnar eru inn myndir úr gönguferð 1. ágúst. En þá var gengið á Blástakk inn af Féeggstaðadal í Hörgárdal. Alls voru 9 með í för. Gengið var á Blástakk, Blekkil, ónefnt fjall og Sörlatungufjall.
- Skoða myndir úr ferðinni.

Fyrirhugað er að ganga á Herðubreið n.k. laugardag. Á föstudag kl. 16 er brottför frá skrifstofu FFA að Strandgötu 23. Gott er að vera mætt(ur) tímanlega til að ganga frá greiðslu. Sameinast verður í bíla. Ætlast er til að bensín- og olíukostnaði verði dreift á milli ferðafélaga. Einhverjir ætla að gista í tjöldum og aðrir í skála. Þorsteinsskáli er bókaður fyrir þennan hóp í tvær nætur. Í Þorsteinsskála er allur borð- og eldunarbúnaður, þar eru einnig dýnur til að sofa á. Reiknað er með 4-5 klst. akstri frá Akureyri. Gangan á Herðubreið frá bílastæðinu við uppgönguna upp á topp er um 3 km og rúmlega 1000 metra hækkun. Minnum fólk á hjálmana sína, kraftmikið nesti, góðan fatnað og skóbúnað. Gott er að vera í góðu gönguformi.
ATH. Uppselt er í ferðina og er kominn langur biðlisti.