FERÐIR 2018

Nýársdagurinn færði okkur stillt veður með smá snjómuggu og skyggni ekki mikið. Mættir voru 7 áhugasamir þáttakendur í gönguferðina og var haldið af stað um kl. 13 og ekið að bílastæðinu austan við Leiruveginn. Nokkur lausasnjór var í skóginum en göngufæri nokkuð gott og fylgdum við göngustígnum. Þar sem stígurinn greinsst fórum við upp stíg sem nú endar við nýlegt íbúðarhús í skóginum. Gengin vegalengd var alls 3,4 km samkvæmt GPS mælingu og göngutími rúmlega 1,5 klst. Fararstjóri var Grétar Grímsson og myndasmiður var Ingvar Teitsson.

FFA efndi til þorrablóts í Botna helgina 17.-18. feb. 2018. Gengið var á skíðum frá Svartárkoti. Blíðskaparveður var báða dagana og fegurð öræfanna ólýsanleg. Þátttakendur voru alls 11. Fararstjóri og myndasmiður Ingvar Teitsson.

Gengið var frá Skíðastöðum út hlíðina að Sjónarhól. Eftir kaffihlé var rennt niður hlíðina og gat hver og einn ráðið sínum hraða því skíðafærið var með ágætum púðursnjór yfir öllu. Fórum eftir stígum þegar niður í skóginn kom og síðan var farið í heitapottinn á Þelamörk.

FFA efndi til skíðaferðar frá Kröflu að Reykjahlíð þ. 14. apríl 2018. Gengið var frá bílastæðinu syðst í Kröfluöskjunni norður fyrir Leirhnjúk og þaðan suðvestur norðvestan Hlíðarfjalls og niður að flugvellinum í Reykjahlíð. Dumbungsveður var í Kröflu en batnaði síðdegis. Þátttakendur voru alls 9, fararstjóri og myndasmiður: Ingvar Teitsson.

Ferðafélag Akureyrar fór í Fossdal 9. júní. 30 manna hópur lagði af stað frá Kleifum í björtu og góðu veðri. Þægileg gönguleið, fyrir utan Flyðrubekkjargilið, um grónar götur að vitanum á Sauðhólsmel og þaðan var gengið inn Fossdalinn. Hvanndalabjargið, hæsta standberg í sjó fram á Íslandi, blasti við og hömrum girtur Fossdalurinn var tignarlegur. Fararstjóri, Helga Guðnadóttir.

Gengið var um Gásir í 1,5 klst í norðanstrekking. Fjölbreytt blómasskrúð og mikið fuglalíf. Þátttakendur voru sex. Fararstjórar voru Helga Guðnadóttir og Guðrún Eggertsdóttir.

Það var fjölmennur hópur sem gekk á Múlakollu í blíðskaparveðri . Gekk ferðinn að mestu vel enda hörkuduglegt og hjálpsamt fólk á ferð. Á toppnum fengum við frábært útsýni í allar áttir. Ánægjuleg ferð með góðu fólki. Myndasmiður og fararstjóri Konráð Gunnarsson.

FFA efndi til gönguferðar í Kreppulindir nyrst í Krepputungu 6.-7. júlí 2018. Við tjölduðum í Arnardal og gengum frá brúnni á Kreppu norður í sporð Krepputungu, um 8-9 km veg. Veðrið var frábært og dalirnir þrír í Kreppulindum eru mikil náttúruperla. Þátttakendur voru alls 16, fararstjórar Ingvar Teitsson og Frímann Guðmundsson. Myndasmiður: Ingvar Teitsson.

Kerling Sjö tinda ferð. Ekið var inn að Finnastöðum þar sem rúmlega þrjátíu manna hópur lagði af stað upp á Kerlingu. Veður var með ágætum 15 stiga hiti logn en skýjað. Þegar upp á Kerlingu kom vorum við kominn upp í skýin sem komu og fóru svo útsýnið var takmarkað þaðan en það átti eftir að batna. Gengið var niður af Kerlingunni í snjó og voru aðstæður hinar bestu. Búið var að sigra Kerlingu þá voru eftir Hverfandi, Þríklakkar, Bóndi, Stórikrummi, og svo Súlurnar syðri og nyrðri. Ekki vafðist það fyrir þessum hressa og samstíga hóp. Fararstjórar voru Frímann Guðmundsson og Konráð Gunnarsson. Myndir Róbert Daníel Jónsson og Frímann

FFA efndi til gönguferðar á Öskjuveginn 20.-24. júlí 2018. Við gengum í frábæru veðri frá Dreka yfir fjöllin vestur í Öskju og nutum útsýnisins og fegurðar svæðisins. Við fengum rigningu á Jónsskarði og norður úr Dyngjufjalladal. Í Suðurárbotnum var hið besta veður. Þátttakendur voru alls 8, fararstjóri og myndasmiður: Ingvar Teitsson.

Ekið var upp að Fálkafelli þar sem gangan hófst Síðan var gengið fyrst eftir hjólastígnum upp á hæðina sunnan Fálkafells og þaðan beint suður Súlueyrar að Steinmönnum. Veðrið var hið besta logn stillt. Það voru allt of fáir sem komu í þessa ferð hvernig sem á því stendur en þeir sem komu ekki misstu af góðri ferð. Myndasmiður og fararstjóri Frímann Guðmundsson.

Góð ferð með góðu fólki frábæru veðri og útsýnið eins og best gerist.

Laugardaginn 8. sept. 2018 gengum við 14 saman frá Fljótsbakka norður með Skjálfandafljóti um Glaumbæjarsel og Fosssel að Skipapolli og þaðan að Vaði. Þungbúið veður var til að byrja með en létti til þegar leið á daginn. Haustlitirnir voru að komast í sinn fegursta skrúða. Fararstjóri og myndasmiður: Ingvar Teitsson.

Ekið var til Mývatnssveitar. Þegar búið var að skrá sig inn í hótelið var ekið upp í Námaskarð þar sem gangan hófst. Gengið var norður úr háskarðinu norður Nautadal eftir Dalsfjalli eftir Hvíthólaklifi fram hjá Þríhyrningum og að Leirhnjúk þar sem gangan endaði um 10 km. Fararstjóri var Stefán Sigurðsson myndasmiður Frímann Guðmundsson.