FERÐIR 2017

FFA efndi til gönguferðar í Vaðlareit á nýársdag 2017. Veður var ágætt, hæg suðvestan gola og hlýtt. Gangfæri var gott. Við vorum um 2 klst. á göngu. Þátttakendur voru alls 17. Fararstjóri: Grétar Grímsson. Myndasmiður: Ingvar Teitsson.

FFA efndi til stuttrar gönguferðar laugardaginn 7. jan. 2017 að stæði nýju virkjunarstíflunnar á Glerárdal. Gengið var inn dalinn að vestan, frá skotæfingasvæðinu. Veður var ágætt, hlýr suðvestan strekkingur. Þátttakendur voru 11, fararstjóri: Valur Magnússon, myndasmiður: Ingvar Teitsson.

FFA efndi til gönguferðar um Hálsaskóg hjá Glæsibæ norðan Akureyrar laugardaginn 21. jan. 2017. Veðrið var frábært, hæg sunnan gola og bjart og hlýtt. Í þessum Norðurlandsskógi er ágætt stígakerfi og þetta er mjög fínt útivistarsvæði. Við vorum þarna á göngu í um 3 klst. Þátttakendur voru alls 10, fararstjóri: Valur Magnússon, myndasmiður: Ingvar Teitsson.

Ystuvíkurfjall. Gengið var frá bílastæðinu á Víkurskarði til norðurs eftir stikaðri leið aðeins upp í hlíðina til að komast fyrir gil. Göngufæri var gott í snjónum en þó var nauðsynlegt að vera í broddum því sums staðar var svell undir. Veður var hið besta, logn alveg þar til við komum á toppinn en ekki sá til fjalla nema til suðurs og austurs. Myndir Valur Magnússon og Frímann Guðmundsson sem var og fararstjóri.

Mikil svellalög eru á göngustígunum í Kjarnaskógi en þegar búið er að setja á sig góða brodda er göngufæri gott. Milt og gott veður var. Fyrst var gengið upp í skálann Gamla og fengið sér nesti. Síðan var haldið inn í Hvammskóg og farið þar eftir stígum uns komið var að hjólastígnum. Sums staðar var snjórinn ansi djúpur en niður brekkurnar var þetta í lagi. Ferðin tók um þrjá tíma, Hin besta ferð en allt of  fámenn. Myndir og fararstjórn Frímann Guðmundsson.

FFA efndi til þorrablóts í Fjallaborg á Mývatnsfjöllum helgina 11.-12. feb. 2017. Gengið var frá hringveginum á Mývatnsöræfum um 9 km suður í Rauðuborgir. Suðvestan hláka var og lítill snjór á leiðinni. Við áttum ágætt laugardagskvöld í Fjallaborg við snæðing, upplestur og söng. Þátttakendur voru allls 9, fararstjóri og myndasmiður: Ingvar Teitsson.

Þoka var og lítið skyggni þegar lagt var af stað í göngu upp á Vaðlaheiði. Flestir afskráðu sig í gönguna og meinga sjá eftir því, því eftir korters göngu var komið upp fyrir þokuna í sól og logn og hið besta gönguveður. Tákn birtist á himni sem var líkt rosabaugi bæði með gýl og úlf en þetta var undan sól en ekki eins og maður sér oftast umhverfis sólina. Hin besta ferð en of fámenn. Myndir og fararstjórn Frímann Guðmundsson.

Vegna snjóleysis varð að aflýsa skíðaferð í Kröflu. Í staðinn fórum við 13 saman í gönguferð í Baugasel í Barkárdal þ. 4. mars 2017. Við fengum heiðríkju og stillt veður en töluvert frost. Á vegarslóðanum frá Bugi fram í Baugasel var rétt snjóföl. Fararstjóri og myndasmiður: Ingvar Teitsson.

Ekið var að Öngulsstöðum og að sumarhúsinu Seli. Gengið upp að vörðunni nyrst á Öxlinni og áfram inn eftir fjallinu. Síðan upp norð-austur hrygg fjallsins á hnjúkinn, 1100 m. 10 km alls. Hækkun: 930 m.

Lagt var af stað í björtu og ágætu veðri og ekið upp að sumarhúsinu Seli. Snjór var ekki mikill en sumstaðar vindbarið harðfenni og var farið upp nokkuð austan við Hausvörðu til að þurfa ekki að fara bratta skafla. Gott gangfæri var inn eftir fjallinu en sumsstaðar svellað. Þegar komið var á fjallshrygginn var að mestu mjúkt færi upp á hnjúkinn. Skyggni var sæmilegt en ekki sólskin. Þáttakendur í ferðinni voru alls 6 og tók ferðin um 6 klst, fararstjóri var Grétar Grímsson.

FFA efndi til gönguferðar á Súlur þ. 1. maí 2017. Við gengum frá bílastæðinu við Heimari-Hlífá í sunnan golu og hlýju vorveðri. Neðan til var snjólítið en á tindinum var snjór og hvasst af suðri. Alls lögðu 19 af stað í gönguna og 18 fóru alla leið upp á tind Ytrisúlu, að fararstjóra meðtöldum. Fararstjóri var Árni Ingólfsson og myndasmiður Ingvar Teitsson.

Laugardaginn 21. maí var hjólaferðin um Múyvatn á dagskrá. 17 manns mættur veðrið frábært og hjólar rangsælis frá Reykjahlíð. Gengið á Vindbelg og síðan kaffi í Seli. Í lokin var val um að ganga á Hverfell eða fara beint í ísinn í Reykjahlíð.

Miðvíkurfoss og Knarrarnes. Ekið að Miðvík sem er beint niður af Víkurskarði. Gengið þaðan niður með ánni, suður bakkann og niður í fjöru og svo eftir henni að tignarlegum fossi Miðvíkurfossi sem fellur hér fram af niður í fjöru. Aftur var farið upp og annar foss skoðaður sem er rétt ofar. Svo var ekið að Knarrarnesi. Knarrarnes sem er innarlega á austurströnd Eyjafjarðar, um það bil beint á móti Hörgárósum, þetta er lítið nes út í fjörðinn, Nesið er nærri mörkum Svalbarðsstrandar- og Grýtubakkahrepps, um miðja vegu á milli bæjanna Garðsvíkur í Svalbarðsstrandarhreppi og Miðvíkur í Grýtubakkahreppi, Fyrrum besta þrautalending við Eyjafjörð. Sorgleg hrakningasaga Látrafeðga tengist Knarrarnesi og má lesa nánar hér. http://www.floraislands.is/Ritgerdir/Knarrarnes.pdf Mordýr hafa fundist þarna þau eru í hópi smádýra sem aðallega lifa í jarðvegi. Þau líkjast skordýrum, teljast til þeirra, hafa sex fætur eins og þau og tvo skynjara á framendanum. En mordýrin eru vænglaus og ýmis sérkenni þeirra tengja þau meira við krabbadýr en skordýr. Flestir aka fram hjá þessum stöðum en það er þess virði að gefa sér örlítinn tíma til að skoða þá. Fararstjóri og myndasmiður Frímann Guðmundsson.

Það var fjölmennur og góður hópur sem gekk á Múlakollu í sumarsólstöðuferð. Veðrið gott enn ekki sást til sólar sem við vonuðumst eftir. Gangan á toppinn gekk vel. Dvöldum á toppnum í dágóðastund og nærðumst og dásömuðum útsýnið þótt sólin léti ekki sjá sig. Takk fyrir góðann dag á fjöllum með skemmmtilegu fólki. Fararstjóri og myndasmiður Konráð Gunnarsson.

Gengið var upp með Reyká í Eyjafirði. Þegar farið var úr bænum var rok og rigning, en þegar við komum inn að Laugaborg var þar nánast logn en smá dropar. Það er alltaf gaman að fara upp með Reyká og sjá hvað gróðurinn hefur vaxið mikið frá því síðast. og þeir sem vilja fara lengra þá er stikuð gönguleið alveg upp á Bónda. Myndir og fararstjórn Frímann Guðmundsson.

Gönguvika, Kvöldganga, Bryðjuskál. Það var fámennur en góður hópur sem gekk upp í Bryðjuskál. Gengið var frá Sigtúni upp fyrir túnin og skáhallt suður upp í skálina,til að gera leiðina auðveldari. Allt gekk þetta vel þótt yfir okkur helltist grenjandi rigning og haglél. Góð ferð með góðu fólki. Fararstjóri Konráð Gunnarsson.

Ekið var á rútu að Stærra - Árskógi og inn dalinn að fjallsgirðing. Þaðan var gengið dalinn á enda til Fornhaga. Svarta þoka var og ekki sást nema nokkra metra, en þegar við vorum kominn alla leið á Úlfá fór að glaðna til. Á leiðinni hittum við nokkra hlaupara sem voru að þreyja Þorvaldsdalsskokkið. Myndasmiður og fararstjóri Frímann Guðmundsson.

FFA efndi til gönguferðar á Almannaveginn helgina 15.-16. júlí 2017. Gengið var frá Herðubreiðarlindaveginum nærri Ystafelli, vestur um Fjallagjá hjá Vörðukambi. Þaðan var fylgt gömlu vörðulínunni norðan Veggjabungu vestur yfir Sveinagjá. Þá var gengið norður í skálann Fjallaborg og gist þar. Þann 16. var gengið vestur um Þrengslin norðan Búrfells og vestur yfir Búrfellshraun í Lúdentshæð. Gengin vegalengd um 47 km. Veður var hlýtt og stillt en lítils hátta rigning af og til. Þátttakendur voru alls 5, fararstjóri og myndasmiður: Ingvar Teitsson.

Góð mæting var í gönguna um Þverárgil, Farin var hefðbundinn leið niður og upp úr gilinu nokkrum sinum. Mikill gróður í gilinu gerir ferð um það á hluta torvellt en skemmtilegt. Góð ferð með góðan hóp. Fararstjóri og myndasmiður konráð Gunnarsson.

Ekið var að eyðibýlinu Kífsá gengið upp með Hrappsstaðaá og upp að fossinum. Þetta var hlýasti dagur á landinu í fimm ár hiti um og yfir 20 stig. Mikið fuglalíf var og náttúran skartaði sínu fegursta. Myndir og fararstjórn Frímann Guðmundsson

Falinn fjársjóður. Ókum upp í Herðubreiðarlindir eftir miklum þvottabrettum á leiðinn uppi eftir. Eftir stutt matarstopp var lagt af stað og tekin bein stefna norður fyrir Herðubreið og þaðan tekin nánast bein stefna á Bræðrafell alls voru þetta 17,9 km. Eins og upp er gefið, en á bakaleiðinni var farin stikaða leiðin og reyndist hún 21,5 km. Þetta er fullmikill munur og ekki rétt að segja að leiðin sé 18. Km. Og ekki fundum við að leiðin væri auðgengnari. Veðrið var sæmilegt þennan fyrsta dag. Daginn eftir var farið upp á Kollóttudyngju í hálfgerðu hrakviðri kalt og rigning en upp var farið, jarðföllin í Bræðrafelli skoðuð og svo var gengið alla leið á toppinn og gígurinn skoðaður. Á bakaleiðinni var ekki nema 30 m. skyggni komum að fellinu baka til þar sem hár og mikill gígur rís upp snarbrattur en þegar komið var hinum megin var hraunrás út úr gígnum sem hægt var að fara inn í. Síðan var farið upp á fellið sem er ólýsanlega fjölbreytt sorfið móberg hraunstapar gjár og kynjamyndir, síbreytilegt og betra að fara varlega. Líklega magnaðasta fell landsins. Enduðum á að skoða nálina sem einkennir fellið. Þótt veðrið væri leiðinlegt var þetta mögnuð ferð. Fararstjóri Frímann Guðmundsson.

FFA efndi til ferðar á Öskjuveginn 28. júlí - 1. ágúst 2017. Ekið var að Drekagili og gist þar í 2 nætur. Vegna þoku gengum við ekki inn í Öskju þ. 29.07., heldur skoðuðum nágrenni Drekagils. Þ. 30.07. var gengið í rigningu og lágskýjuðu veðri frá Öskjuopi um Jónsskarð í Dyngjufell. Eftir það batnaði veðrið og þ. 01.08. var sól og blíða, eins og myndirnar sýna. Við gengum í Svartárkot og vorum sótt þangað. Þátttakendur voru alls 10, að fararstjóra meðtöldum. Fararstjóri og myndasmiður: Ingvar Teitsson.

Gengið var á Hreppsendasúlur á Lágheiði laugardaginn 20. ágúst 2017 í björtu og fallegu veðri. Þátttakendur voru sjö og tíkin Tinna að auki. Fararstjóri var Una Þórey Sigurðardóttir og myndasmiður Frímann Guðmundsson.

Gengið var á Kerlingu í Eyjafirði, 1538 m, frá Finnastöðum og svo norður eftir tindunum Hverfanda, Þríklökkum, Bónda, Litla Krumma, Stóra Krumma, Syðrisúlu og Ytrisúlu. Endað í Glerárdal við Heimari Hlífá. Bjart var í fyrstu en fljótlega fór þokan að slæðast að. Þegar komið var upp í Heimari Lambárbotna kom í ljós að margar sprungur voru og þurfti að fara varlega. Snjórinn var ekki fær svo brölt var upp á Kerlinguna eftir skriðum og klungri sem var laust svo lítið mátti hreyfa við steinum svo þeir færu á stað og settu þá í hættu sem á eftir fóru. Sól var á hátoppnum og gott veður allan tíman. Niðurferðin var líka seinfarin því fara þurfti Röðulinn með lausu grjóti og klungri. Allt gekk þetta þó slysalaust og var komið á leiðarenda um kl. tíu um kvöldið. Fararstjórar Árni Ingólfsson og Frímann Guðmundsson sem tók myndirnar.

FFA efndi til ferðar á Gullveginn yfir Mývatnsheiði og Fljótsheiði laugardaginn 26. ágúst 2017. Gengið var frá Helluvaði vestur yfir Helluvaðsgrófir og Óþveginslæk í Laugasel. Þaðan var gengið um Stafnsholt í Brenniás. Loks var gengið norður milli Kálfatjarna og eftir Stóraási í Arndísarstaði í Bárðardal. Veðrið var frábært og heiðarnar skörtuðu fyrstu haustlitunum. Við gengum um 24 km á rúmum 8 klst. Þátttakendur voru alls 20, að fararstjóra meðtöldum. Fararstjóri og ljósmyndari: Ingvar Teitsson.

Gengið var á Hleiðargarðsfjall í Eyjafirði. Sæmilegt skyggni var en fór að rigna í lok ferðar. Þessi tíu manna hópur lét það ekki á sig fá og var hinn kátasti. Fararstjóri og ljósmyndari: Elín Hjaltadóttir

Gengið umhverfis Héðinsfjarðarvatn. Ekið var frá Akureyri kl. 9 og ekið gegnum  Dalvík Ólafsfjarðargöng, Ólafsfjörð og Héðinsfjarðargöng til Héðinsfjarðar.  Gengið var út með vatninu að vestan um Lindir og Hesteyri yfir eyðið milli vatnsins og sjávar. Síðan var vaðið yfir Héðinsfjarðará og gengið út í Vík þar sem var stoppað og fengið sér að borða. Veður hafði verið hið besta smá úði sem þornaði jafn óðum í sunnan þei og 18 stiga hita. En brátt fór að rigna sem jókst eftir sem á leið og þegar við komum að bílunum var komin úrhellis rigning og flestir ornir vel blautir. Mjög miklar og góðar upplýsingar má fá eftir Helga Guðmundsson um eyðibyggðirnar farna norður frá á vefnum. http://snokur.is/hedinsfjordur-hedinsfjordur.html  Fararstjóri var Frímann Guðmundsson sem tók myndirnar.

Ísland er jarðfræðiundur og margt af því sést þegar farið er upp á Halllok fyrir ofan Hraun í Öxnadal. Það var öflugur og samstilltur hópur sem réðst í uppgöngu á Halllok. Stefnan var tekið á Auðnaháls og þegar upp á hrygginn kom var farið eftir honum upp. Látum myndirnar tala sínu máli. Fararstjóri og myndasmiður var Frímann Guðmundsson. 

Gengið var á Fjall mánaðarins, Þingmannahnjúk, og lagt af stað um 10 - leytið og keyrt að Eyrarlandsafleggjara þar sem bílnum var lagt. Veður var frekar þungbúið og smá snjómugga í hægviðri. Göngufæri var ekki upp á það besta, nýr snjór í lautum og lækjum. Af hnjúknum sást sæmilega til miðbæjarins en tæplega mikið lengra. Þáttakendur voru alls 3 að fararstjóra meðtöldum sem var Grétar Grímsson.