Ferðir 2020

Vegna fjöldatakmarkana í samfélaginu er ekki hægt að boða til árlegs félagsfundar í janúar 2021. Þess í stað setur stjórn svolítið yfirlit yfir árið inn á heimasíðu FFA ásamt myndum úr starfinu. Aðalfundur FFA verður haldinn í mars ef allt gengur að óskum í samfélaginu. Myndirnar eru í raun glærur sem þið skoðið með því að smella á fyrstu mynd og svo er skoðað áfram með því að smella á píluna.

Nýrasgangan var fyrirhuguð um bakka Eyjafjarðarár en vegna ófærðar var snúið við og farið í Kjarnaskóg þar sem var mjög gott að ganga enda fullt af fólki á ferð. Fararstjóri var Grétar Grímsson. Myndir Þorgerður Sigurðardóttir.

Hætt var við að fara upp á Súlumýrar vegna veðurs en í staðinn var farið inn í Naustaborgir og skíða þar. Fararstjóri var Frímann Guðmundsson.

Gengið á gönguskíðum fram og til baka að skálanum Derri í vestanverðum Þorvaldsdal. Auðveld ganga, alls um 18 km. Lítil hækkun.

Gangan hófst við Bug í Hörgárdal. Fremur létt og þægileg leið meðfram Barkánni. Ískán var á snjónum sem gerði færið aðeins erfiðara. þar sem gengið var að eyðibýlinu Baugaseli. Fararstjóri Árni Björsson myndir Frímann Guðmundssson.

Þann 9. maí fór Helga Guðnadóttir fararstjóri í gönguskíðaferð með fimm manna hóp frá FFA. Skíðað var í Ytri Árdal í Ólafsfirði. Veðrið lék við þátttakendur eins og myndirnar sýna og skíðafæri var gott. Þetta var fyrsta ferð FFA eftir COVID samkomubannið og reyndi fólk að halda fjarlægð í ferðinni eins og hægt var. Myndasmiðir Helga Guðnadóttir og Þuríður Helga Kristjánsdóttir.

Farið var í fuglaskoðunarferð frá FFA laugardaginn 16. maí um Eyjafjarðarsvæðið sunnan Akureyrar. - Veður var gott mestan tímann en dulítið svalt undir lokin sem gerði ekkert til fyrir þá sem kunnu að búa sig. Þátttakendur voru 17 auk fararstjóranna tveggja. Metið okkar frá í fyrra stendur enn en við náðum að sjá 39 tegundir og sumar nokkuð spes. - Við sáum t.d. skeiðendur, brandendur, rauðbrystinga, grafönd, gargönd, tjald á ,,hreiðri" nánast á veginum. Æðarfugl á eggjum og einnig álftir á dyngju sinni. Þá voru tildrur í fjörum og sendlingur sást svo og sandlóa og fýll í lok ferðar og Toppönd. Ekki var laust við að sæist bros á öllum einhvern tíman í ferðinni. - Vilborg sá að venju um að fararstjórar yrðu ekki hungurmorða í ferðinni og hafi hún þakkir fyrir. Sökum ástands í þjóðfélaginu urðum við að fara á fleiri bílum en venjulega þannig að nokkuð var misjafnt hvað skoðunarmenn fengu að heyra margar fuglasögur í ferðinni. Að öðru leyti tókst ferðin vel í alla stað. Fararstjórar Jón Magnússong og Sverrir Thorstensen. Texti og myndir Jón Magnússon.

Hjólaferð um Svarfaðardal rólegt veður frekar kalt og þoka til fjalla. Níu manns tóku þátt og áttum góðan dag. Hjólað frá Dalvík og farið inn að austan. Stoppað víða á leiðinni en lengst var stoppað á Húsabakka og gengið yfir í Hánefsstaðaskóg og tekið nesti þar. Endað svo á Dalvík og mældist þessi hringur tæpir 29 km. Myndasmiður Jón M Ragnarsson.

Fararstjóri og myndasmiður: Baldvin Stefánsson

Fyrsta viðbótarferðin sumarið 2020 var farin 31. maí. Ingibjörg Elín Jónasdóttir leiðsögumaður var fararstjóri. Fjörutíu manns voru í göngunni og komust færri að en vildu. Ingibjörg leiddi gönguna og var með fróðleik um jarðsögu Mývatnssveitar. Gangan sjálf var 10 km og tók um 4 tíma. Myndir Þorgerður Sigurðardóttir, Margrét K. Jónsdóttir og Ingibjörg Elín Jónasdóttir.

Fyrsta ferð í barnastarfi FFA var farin í fjöruna að Gásum 8. júní kl. 17. Brynhildur Bjarnadóttir náttúrufræðingur fræddi börn, foreldra og afa og ömmur um lífríkið í fjörunni. Hún svaraði spurningum barnanna og fræddi þau einnig um mikilvægi þess að ganga vel um sjóinn. Þrátt fyrir rigningu mættu á þriðja tug í ferðina sem var afar vel heppnuð og fræðandi. Myndir Þorgerður Sigurðardóttir.

Blómaskoðunarferð inn á Glerárdal tókst vel. Reyndar var talsverður snjór og mikið vatn í ánni en alltaf hægt að finna áhugaverð blóm í ferðinni. Brynhildur Bjarnadóttir náttúrufræðingur leiddi gönguna og fræddi viðstadda um það sem fyrir augu bar. Gaman er að sjá að í ferðinni voru nokkur börn, það yngsta 9 mánaða. Myndir Brynhildur Bjarnadóttir og Guðný Sigríður Ólafsdóttir.

Í sumar hefur FFA bætt við nokkrum göngum. Ein þeirra var farin að kvöldi 20. júní. Leiðsögn og fararstjórn var í höndum Björns Ingólfssonar sem leiddi 48 manna hóp um ströndina og sagði frá. Veðrið lék við þátttakendur og var kvöldið einstaklega fallegt. Sama kvöld var fyrirhuguð ferð á Múlakollu sem var aflýst vegna jarðskjálfta á svæðinu. Allt var með kyrrum kjörum á Látraströnd. Myndir Arna H. Guðmundasdóttir og Þuríður H. Kristjánsdóttir.

Fyrsti dagin í gögnuviku FFA var gengið á Miðvíkurfjall/-hnjúk í frábæru veðri. Lagt var af stað kl. 21. Veðrið lék við þátttakendur og var sólarglaið engu líkt. Fararstjóri og myndasmiður: Grétar Grímsson

Góður hópur fór ó þessa ferð eina kvöldstund í júní. Ingvar Teitsson leiddi hópinn en FFA gönguleiðanefnd FFA stikaði þessa leið fyrir ári síðan og hefur hún náð miklum vinsældum. Myndir Ingvar Teitsson.

Mjög góð þátttaka var í kvöldgöngu FFA í gönguvikunni að Miðvíkurfossi. Roar Kvam leiddi hópinn að þessari földu perlu í nágrenni Akureyrar. Þetta er stutt ganga niður að sjó. Eftir að hafa skoðað fossinn fræddi Roar okkur um fjallahringinn í Eyjafirði. Ekki var síðra að skoða gilið fyrir ofan fossinn. Myndir Þorgerður Sigurðardóttir.

Ekið var inn að Sigtúni. Þaðan var gengið skáhallt upp hlíðina upp í Bryðjuskál. Þokuruðningur var en birti er á daginn leið. Fararstjórn og myndir Frímann Guðmundsson

Það var góð þátttaka í ferð FFA um Laxárdalinn. Lagt var af stað frá Rönd, gengið meðfram Sandvatni og endað við Ljótsstaði. Ingvar Teitsson leiddi hópinn þessa skemmtilegu leið. Veðrið lék við þátttakendur og margt bar fyrir augu á leiðinni eins og fjölbreytt fuglalíf, hreiður ýmsar blómategundir auk fallegarar sýnar á fjöllin í kring. Myndir Þorgerður Sigurðardóttir og Ingvar Teitsson.

Árleg ferð FFA á Kerlingu og sjö tindana tókst vel og fóru um fjörutíu manns með Viðari Sigmarssyni, Balvini Stefánssyni fararstjórum og nokkrum félögum í 24 x 24. Hópurinn var heppinn með veður og gat notið ferðarinnar. Myndirnar tóku þeir Baldin Stefánsson og Viðar Sigmarsson.

Þessi ferð var viðbótarferð sumarið 2020. Ingvar Teitsson fór með nokkra göngumenn og sagði þeim frá fronum görðum á Fljótsheiði. Áhugi fólks var vakinn á þessu fyrirbrigði með bók Árna Einarsson, Tíminn sefur sem kom út 2019. Myndir Árni Ólafsson og Ingvar Teitsson.

Þessi ganga var fyrsta gangan í gönguviku í júlí. Veðrið lék við þátttakendur og skall á hiti og logn í kvöldkyrrðinni þegar leið á kvöldið. Eins og myndir Hafdísar G. Pálsdóttur og Ingimars Eydal bera með sér er neðra Glerárgilið fallegt og þar margt að sjá. Fararstjóri var Ingimar Eydal.

Þessi ganga var önnur í röð gönguviku FFA í júlí. Lögmannshlíðarhringurinn var genginn með viðkomu í Lögmannshlíðarkirkju og á Hesjuvöllum þar sem Helga Björg Jónasardóttir tók á móti hópnum, sagði frá og bauð í te sem hún hefur gert úr jurtum sem vaxa á Hesjuvöllum. Fararstjóri var Þorgerður Sigurðardóttir og bætti Svala Sigurðardóttir sannarlega upp ferðina þar sem hún sagði frá ýmsu á leiðinni en hún er alin upp í Lögmannshlíðinni. Myndir Þorgerður Sigurðardóttir.

Þriðja ganga gönguvikunnar var byggingarlistarganga á Akureyri. Árni Ólafsson arkitekt gekk um bæinn og benti fólki á mismunandi byggingarstíla og tímabil auk þess að lesa í hús og skipulag bæjarins. Myndir Þorgerður Sigurðardóttir.

Bláskógavegur var genginn laugardaginn 15. ágúst í blíðskaparveðri. 20 manns tóku þátt í göngunni. Gengið var frá Rauðhól að Undirvegg alls 20 km. Fararstjóri var Sigurgeir Sigurðsson. Myndirnar tók Sigurgeir Sigurðsson.

Farin var helgarferð í Herðubreiðarlindir og Öskju þar sem gist var í Þorsteinsskála. Í ferðinni voru 22 þátttakendur, þar af fjögur börn. Akureyrarbær styrkti ferðina. Ferðin tókst í alla staði vel og lék veðrið við þátttakendur. Um nóttina lenti hópurinn í því að þurfa að flytja sig yfir í Dreka vegna vatnavaxta sem jók enn á ævintýrið. Á heimleiðinni var farið austur fyrir og stoppað í Hvannalindum þar sem sagan af Eyvindi og Höllu fékk framhald. Stoppað var við sæluhúsið við Jökulsá. Fararstjóri var Þuríður A. Hallgrímsdóttir. Myndirnar tóku Elísabet Gestsdóttir og Róbert Kárason.

LAugardaginn 22. agúst fór vaskur 20 manna hópur í mjög skemmtilega ferð á Kaldbak og Svínárhnjúk. Krefjandi en góð ganga. Veðrið var upp á sitt besta eins og sést á myndunum. Fararstjóri var Baldvin Stefánsson sem tók einnig myndirnar.

Gengið var frá Garði í Mývatnssveit í Seljahjallagil og aftur til baka ca. 20 km leið. Ferðin gekk vel í alla staði og margir sem höfðu á orði að Seljahjallagil væri ekki síðra en Stuðlagil. Fararstjórar voru Herdís Zohaníasdóttir og Þuríður Anna Hallgrímsdóttir. Myndir Þuríður A. Hallgrímsdóttir.