Ferðir 2013

FFA efndi til árlegrar göngu á nýársdag 2013. Lagt var af stað frá bílastæðinu neðan við Kjarnaskóg og gengið austur yfir gömlu brýrnar á Eyjafjarðará að brekkurótum neðan við Knarrarberg. Síðan var gengið sömu leið til baka. Veður var ágætt, kyrrt og nokkurra gráðu frost. Sumir voru á skíðum og fengu ágætt færi. Þátttakendur voru 10 að fararstjóra meðtöldum. Fararstjóri: Grétar Grímsson, myndasmiður: Ingvar Teitsson.

Naustaborgir. Þar sem mjög hvasst var upp á Súlumýrum var ákveðið að fara heldur inn í Naustaborgir. Þaðan upp í Gamla og inn í Hvammsland. Síðan var farið til baka eftir gönguslóðinni. Skíðafærið var erfitt, blautur snjór sem settist neðan á skíðin sérstaklega upp í gegnum skóginn þar sem tíu sentimetrar voru komnir neðan á skíðin ef þeim var lyft. En allt gekk þetta nú vel þótt erfitt væri á köflum. Veðrið var hið besta, um fimm gráðu hiti. Fararstjóri vra Frímann Guðmundsson.

FFA efndi til árlegarar þorrablótsferðar á fjöll helgina 16. - 17. febrúar 2013. Að þessu sinni var þorrablótið haldið í Botna. Ekið var á bílum í Svartárkot og gengið þaðan á skíðum í Botna. Mikill snjór var og skíðafærið mjög gott. Kyrrt veður var laugardaginn 16. feb. en alskýjað. Við áttum ágætt kvöld í Botna við mat, drykk, söng og upplestur. Sunnudaginn 17. feb. var versnandi veður. Við fórum úr Botna kl. 09.30 og vorum komin í Svartárkot kl. 12.15. Snjór var töluverður á vegi og mjög blindað niður Bárðardal en heimferðin gekk þó að óskum. Þátttakendur voru alls 7. Fararstjóri og myndasmiður Ingvar Teitsson.

Ekið var að afleggjara upp með trjálundi í Veigastaðalandi og gengið upp heiðina að vörðunni þaðan sem víðsýnt um Eyjafjörðinn. Vegalengd samtals 6 km. Gönguhækkun 530 m.

Lambi Ákveðið var að breyta skíðaferð til Ólafsfjarðar í göngu upp í Lamba sem fallið hafði niður vikuna áður vegna harðfennis. Ástæðan var meðal annars sú að snjóflóðahætta er víða þar sem snjóað hefur ofan á harðfenni. Lagt var af stað um kl 10:30 frá Extreme (gamla vigtunarhúsinu) þar sem ófært var upp á plan. Skíðafæri var gott, snjór var nægur og góður en talsvert djúpur þegar komið var upp fyrir Lambá. Ferðin gékk ljómandi vel frameftir, í upphafi ferðar var ansi dimmt fram á dalnum en eftir því sem framar kom létti til og þegar fram í Lamba kom var komið sólskin og logn og var því bæði matast úti og inni eftir því sem menn kusu. Elín sá til þess að heimferðin varð ögn sögulegri. Þegar við vorum komin vel yfir Lambá á heimleiðinni fór Elín að laga skíðið, og áður en nokkur vissi fór skíðið á skrið niður og þrátt fyrir heiðalega tilraun Grétars þaut skíðið niður allar brekkur og hvarf með stefnuna í Glerána. Konni og Frímann fóru að leita en ekkert fannst í ánni sem var opin og það var ekki fyrr en aftur var farið upp og förin þrædd niður að skíðið fannst á síðustu brúninni við ána. Sem betur fer var skíðið óskemmt. Eftir þetta gekk ferðin niðureftir eins og í sögu í glaða sólskini og logni. Komutími rétt fyrir fimm. Frímann Guðmundsson fararstjóri, Konráð Gunnarsson tók myndirnar.

Það var frekar dimmt í lofti þegar lagt var af stað frá bílastæðinu í Héðinsfirði, norðan gola og 6 stiga frost. Stefnan var tekin út að Vík og gengið austan megin og oftast úti á ísilögðu vatninu þar sem skíðafæri var mjög gott. Þegar komið var út fyrir Víkursandinn var farið undir Víkurkleifunum og heim að gamla bænum í Vík þar sem Helga las fyrir okkur minningarbrot fyrri ábúanda sem geymt var í gestabókinni. Því næst var farið í slysavarnarskýlið þar sem við borðuðum nestið okkar. Á bakaleiðinni var komið sólskin og logn og var farið yfir ósinn og að veiðihúsinu og áfram eftir ísnum að bílastæðinu. Hluti göngufólks skellti sér á Sigló en hinir héldu áfram inn að Ámá þar sem hægt var að skoða gamlar bæjarrústir. Fararstjóri var Una Sigurðardóttir, myndir: Grétar Grímsson

FFA efndi til skíðaferðar á Fljótsheiði meðfram Kálfborgará laugardaginn 23. mars 2013. Ekið var að Engidal og gengið þaðan í logni og sól vestur að Kálfborgarárvatni. Síðan var haldið norður með vatninu að ós Kálfborgarár. Ánni var síðan fylgt að Hrappsstaðaseli. Þaðan gengum við norður í Brenniás og síðan upp á Kálfborgina. Loks var haldið norður að Stóraási og þaðan norðvestur og niður að Einbúa þar sem við geymdum bíl. Mikill snjór var og skíðafæri ágætt. Gangan tók 6 klst. og 10 mín., leiðin var 22-23 km, afar þægileg skíðaleið. Fararstjóri og myndasmiður: Ingvar Teitsson.

Gengið var frá gönguskíðahúsinu við Skíðastaði og út hlíðina alveg út á Sjónarhól. Mjög snjóblint var en skíðafæri frábært. Veður var stillt og lágskýað. Smá stopp var gert á Sjónarhól, og rétt vestan við hann var djúp snjógeil og þar var gert kaffistopp. Síðan er þægilegt rennsli kílómetrum saman niður, nema hvað allt rann saman vegna snjóblindu, en niðurferðin gekk samt ljómandi vel frábært rennsli og nægur snjór alveg niður að Þelamerkurskóla. Síðan var farið í heita pottinn og slakað á. Myndasmiður og fararstjóri: Frímann Guðmundsson.

Boðið var upp á flott gönguveður þegar FFA og gönguhópurinn 24x24 skipulagði ferð á Hvassafellsfjall (Hest) í byrjun apríl, gengið var frá bænum Miklagarði undir rótum fjallsins. Snjólétt var á fjallinu nánast þrjá fjórðu upp á topp fjallsins og tiltölulega auðvelt að þræða hrygginn, en þegar komið var í snjó var hann mög harður og stutt í klaka svo þá skelltum við okkur í brodda og var þá mun einfaldara að ganga upp. Efsti parturinn á Hestinum er nokkuð snúinn og ekki alltaf auðelt að finna leið upp en tókst það að lokum og fengum við flott útsýni í allar áttir að launum. Fararstjóri og myndasmiður: Viðar Sigmarsson

15 manns mættu í 1 Maí göngu FFA á Súlur, 11 fótgangandi 4 á skíðum. Veður og færð í góðu lagi mestanhluta leiðarinnar.Á toppnum var skyggnið lítið sem ekkert og töluverð gjóla. Á heimleiðini lentum við í þoku og mikilli snjóblindu niður undir Snægil, að öðru leiti gekk ferðin heim vel og allir kátir með sig og ferðina. Fararstjóri Konráð Gunnarsson.Myndasmiðir K.G og F.G.

Kaldbakur Laugardaginn 11. maí var boðið upp á göngu og skíðaferð upp á Kaldbak. Veður var hið besta og göngufæri og skíðafæri gott þetta árið en samt óvenjumikill snjór alveg niður í fjöru. Gangan hófst norðan við Grenjána og var gengið upp hrygginn upp á Kaldbak alveg norður að herforingjavörðunni sem hlaðin var árið 1914, sem nú var rétt uppúr að hálfu. Þar var kaffistopp, "sumir hituðu sér kaffi" og umhverfið skoðað. Vel sást inn Eyjafjörð og út en ekki eins gott útsýni austur. Rétt þegar kaffistoppið var á enda skall yfir þoka og útsýnið hvarf. Fararstjórn 24x24 Viðar Sigmarsson. Myndasmiður Frímann Guðmundsson.

Reistarárskarð-Flár Frá Akureyri var ekið að Freyjulundi í Arnarneshreppi. Um kl. 8:30 var lagt af stað og gengið upp með Reistaránni að norðan. Mikill snjór var enn í skógarlundinum hann var meira og minna á kafi en samt var greinilegt nú þegar að mikið var brotið af trjám. Fararstjórinn var eitthvað utan við sig og þegar við vorum komin hálfa leið upp í skarð spurði Helga hann hvar skíðastafirnir væru, nú þeir voru niðri í bíl og ekki var um annað að gera en sækja þá. Veður var gott fyrst var vindur af austri og ýtti hann okkur upp brekkurnar en þegar upp var komið var suðvestanátt. Gengið var yfir fjallið, um þrír km., þar til staðið var á brún Þorvaldsdals. Samkvæmt veðurspánni mátti búast við að þokan legðist yfir svæðið um hádegið, en sem betur fer rættist það ekki. Gott útsýni var yfir fjöllin. Vestan Þorvaldsdals blöstu við fótum okkar og sáum við Grímsey og allt austur á Snæfell. (sjá myndi) Ljúft rennsli var á bakaleiðinni og renndum við okkur um Sperðil niður í Reistarárskarð . Það var hægt að fara á skíðum alveg niður að bíl. Fararstjóri og myndasmiður Frímann Guðmundsson.

Ferðasögu úr þessari ferð má sjá hér: https://www.ffa.is/is/ferdasogur/drangey

20130608 Kotagil - Bólugil

Gönguvika FFA - gengið var á Ystuvíkurfjall frá bílastæði á Víkurskarði þangað sem við höfðum ekið upp úr dimmri þokunni og var veður hið besta. Víða voru fannir í hlíðum en göngufæri gott. Toppnum var náð kl. 21:30 í sólbjörtu veðri og við blasti þokufylltur Eyjafjörðurinn. Þáttakendur í ferðinni voru 12 manns. Fararstjóri var Grétar Grímsson. Ljósmyndarar Frímann Guðmundsson og Grétar Grímsson

Gönguvika Bryðjuskál. 14 manns auk fararstjóra gengu upp í Bryðjuskál frá Sigtúni 10 konur 5 karlar. Allir fóru upp enn voru mislengi enda voru á ferðinni bæði vanir og óvanir. Enginn af hópnum nema fararstjórinn hafði komið í Bryðjuskál. Veðrið lék við okkur alla leið og útsýnið gott. Ekki var mannskapurinn þreyttari en það eftir ferðinna í skálina að allir voru tilbúnir í meira. Skutumst við suður að Þverá og skoðuðum gamla virkjun og fossinn í ánni. Góð ferð með kátan hóp. Myndasmiður og farastjóri Konráð Gunnarsson.

Harðarvarða Við vorum níu göngumenn sem mættu klár við skíðaskálann í Hlíðarfjalli til að takast á við þriðja verkefni gönguviku Ferðafélags Akureyrar, en það var að ganga upp að Harðarvörðu. Allmikill snjór er enn í Hlíðarfjalli og við ákváðum að ganga upp Mannshrygginn þar sem hann var tiltölulega auður, en allblautt var á leiðinni og stutt í leirdrulluna. Gengið var nánast eingöngu í snjó að vörðunni er við komum upp á brún. Við völdum að ganga sneiðinginn (veginn) niður þar sem búið var að ryðja hann en sú leið var öll gengin í snjó. Af þeim sökum voru sumir orðnir rennandi blautir þegar við komum aftur niður að Skíðaskála, sæl og glöð með flotta ferð í mjög góðu gönguveðri. Myndatökumaður og fararstjóri Viðar Sigmarsson.

Stórihnjúkur Föstudagskvöldið 14. júní lauk gönguviku FFA með ferð á Stórahnjúk. Veður var sérlega hentugt til göngu, sólríkt en svolítið svöl norðanáttFámennt var í ferðinni en góðmennt, einungis fimm manns með fararstjóra. Reyndar skiluðu einungis fjórir göngumenn sér, þar sem Karl Stefánsson ákvað að halda áfram för sinni heim að Bægisá.

Múlakolla FFA fór sína árlegu sumarsólstöðugöngu á Múlakollu föstudaginn 21. júní. Við lögðum af stað frá skrifstofu FFA kl 19:00 þátttakendur voru fjórtán. Veðrið var gott, smá þoka til fjalla. Við gengum upp frá Brimnesi í Ólafsfirði um átta leytið létt í spori. Það var smáþoka í 600-7oo m hæð. Þegar við komum upp á fremstu kolluna gengum við upp í sólina. Útsýnið var frábært og fjallatopparnir gægðust upp úr allt vestur til Stráka við Siglufjörð. Við vorum uppi um miðnætti og nutum veðurbíðunnar og gengum um toppana. Ferðin gekk vel í alla staði og allir hressir og kátir með ferðina. Ég þakka göngufélögum mínum fyrir skemmtilega og ánægjulega ferð. Bestu kveðjur Gunnar Halldórsson fararstjóri.

Fossá Gengið upp með Fossárgili við Þelamörk. Þetta var önnur kvöldganga Ferðafélags Akureyrar þessa vikuna. En nú stendur yfir gönguvika Akureyrarstofu í samstarfi við ýmsa aðila. Tuttugu og átta sprækir göngumenn komu í þessa ferð þótt veðrið væri ekki eins gott og undanfarnar vikur. En þegar við komum á staðinn var veður stillt og úrkomulaust. Á annan tug fossa er í þessari á, svo ef menn hafa gaman að fossum er um að gera að líta á þessa. Háifoss, Hesthúsfoss, Bæjarfoss, Skútafoss, o.s.frv. Endað var á að fara suður að Vindheimaborg sem Ferðafélagið Hörgur hefur lagað nýlega og er hin reisulegasta. Fararstjórar Viðar og Frímann, myndir Frímann. Sjá myndband. Farið er í myndir þar neðst í listanum eru myndbönd.

Þverárgil. Góð mæting var í gönguna í Þverárgil. Fararstjórinn þvæltist með hópinn ofaní og upp úr gilinu nokkrum sinum og allir fylgdu með. Enginn í hópnum hafði áður farið þessa leið. Fararstjóri og myndasmiður var Konráð Gunnarsson.

Stóralækjargil Sjá myndband. Farið er í myndir þar neðst í listanum eru myndbönd. Frekar var nú fámennt enn góðmennt í ferðinni í Stóralækjargil. Gengið var upp með gilinu að norðanverðu sem ég tel vera betri leið en að sunnanverðu. Gengum upp í 800 m hæð og síðan niður að sunnanverðu. Það ættu allir sem eru í góðu gönguformi að fara þessa leið. Takk fyrir góða kvöldferð. Fararstjóri og myndasmiður Konráð Gunnarsson.

Heljardalsheiði Þann 6. júlí kl. 9 lagði 24 manna hópur á vegum FFA af stað frá Atlastöðum í Svarfaðardal á leið yfir í Kolbeinsdal um Heljardalsheiði. Veður var þokkalegt en smá rigningarúði af og til á leiðinni. Efst á heiðarbrúninni var hvasst og gekk á með slydduéljum en það lagaðist þegar neðar dró í Heljardalinn. Vaðið yfir Heljarána var ekki gott, mikið í ánni og botnin stórgrýttur. Þegar komið var niður í Kolbeinsdalinn áðum við í Heljarréttinni áður en vaðið var yfir Kolbeinsána. Hún var auðveld yfirferðar, dreifðist í marga ála og enginn mjög djúpur. Þegar yfir var komið byrjaði að hellirigna og var því gengið mjög rösklega niður að Fjalli þar sem rútan beið okkar. Vorum við komin þangað kl. 17 og vorum því í 8 klst. á leiðinni. Mikill snjór var á heiðinni og gott að ganga á honum og flýtti það för okkar því að við þurftum aldrei að vaða yfir læki. Fararstjóri var Helga Guðnadóttir og til aðstoðar Una Sigurðardóttir. Myndir tók Helga Guðnad.

Þeistareykjabunga. Fórum af stað frá Akureyri um kl. 8. Komum við á Húsavík, þar bættist í hópinn og vorum við þá níu með fararstjóra, frá fjórum þjóðlöndum. Ferðin gekk ágætlega. Við ókum upp í Bóndhólsskarð og gengum þaðan til norðausturs að Langavíti en það er hæsti hluti Þeistareykjabungu. Þar var tekið hádegishlé. Síðan fórum við til suðurs að Stóravíti en þaðan er sagt að annað stærsta hraun landsins sé komið. Næst var komið að Litlavíti. Þaðan ætluðum við að ganga eftir slóðinni aftur í Bóndhólsskarð en það var svo mikill snjór og bleyta að við urðum að ganga eftir mónum alla leið. Stoppuðum og fengum okkur kaffisopa við skálann á bakaleiðinni. Veðrið var ágætt, sunnan vindur, bjart og hlýtt. Allir glaðir og ánægðir eftir góðan dag. Sigurgeir Sigurðsson Fararstjóri og myndasmiður

Sjötindaferð Fyrst var gengið á hæsta fjall í byggð á Íslandi, Kerlingu í Eyjafirði (1538 m). og þaðan var gengið norður eftir tindunum Hverfanda, Þríklökkum, Bónda, Litla Krumma, Stóra Krumma, Syðrisúlu og Ytrisúlu, að lokum gengið niður í Glerárdalinn þar sem ferðin endaði. Veðurspáin var ekki of hagstæð átti að verða lágskýað þegar liði á daginn. Á uppleiðinni lagðist þokan yfir topp Kerlingar annað slagið en þegar við komum upp fengum við gott útsýni í allar áttir. Nokkrir gengu á vesturbrún Kerlingar sem er um eins km gangur hvora leið og fengu gott útsýni yfir Glerárdalinn og nágrenni og einn maður og hundur sem slegist höfðu í hópinn skelltu sér niður í Lamba. Nánast var logn allan daginn og topp gönguveður og þokan var svo tillitsöm að hún kom á eftir okkur og lagðist yfir tindana hvern á eftir öðrum en ekki fyrr en við vorum kominn yfir og farin niður. Sextán voru í þessari ferð með fararstjórum. Fararstjórar: Sigurlína Jónsdóttir og Frímann Guðmundsson. Frímann og Haukur Grettisson tóku myndirnar. Ljóðræn ferðasaga er undir Ferðasögur hjá FFA /slóð: http://www.ffa.is/is/ferdasogur/sjotindaferd-ljodraen-ferdasaga

Lagt var af stað kl 8:10 og ekið í Varmahlíð þar sem leiðsögumaður okkar , Hjalti Pálsson bættist í hópinn auk nokkurra þátttakenda í ferðinni. Áfram var haldið inn að Þorljótsstöðum og ekið upp fjallveginn sem liggur áleiðis í Laugafell og að fremra Stafnsvatni þar sem farið var úr bílnum. Þaðan var svo lagt af stað í sól og blíðskaparveðri og gengið að brún Vesturdals þar sem við skoðuðum Háabaðstofu sem er þar efst í brúninni. Þá var farið niður Runubrekkuna að Runukvísl sem auðvelt var að vaða yfir í Hraunþúfutangann þar sem hellisskútinn Bjartabaðstofa er. Því næst var gengið inn í Hraunþúfugilið þar sem staldrað var við gengt hinum tignarlega Hólófernishöfða og hlítt á frásagnir og mergjaðar sögur Hjalta fararstjóra. Að því loknu var gengið út Hraunþúfutangann og vaðið yfir Hraunþúfuána og stefnt á rústir Hraunþúfuklausturs þar sem við ætluðum að snæða máltíð dagsins. Var nú farið að þykkna heldur í lofti og einstöku regndropi að falla sem fylgt var eftir með þrumum og eldingum. Stóðst það á endum að þegar við tókum upp okkar langþráðu máltíð steyptist yfir þvílíkt steypiregn að annað eins hafði ekki sést. Fór allt á flot á svipstundu og var þá allt tekið saman og gengið áfram í regndembunni niður með Runukvíslinni. Að lokun stytti upp og þornaði fljótt í hlýrri golunni og voru skoðaðar rústir fofnbýlis og fengum við langþráða hressingu í fornum seltóftum. Var nú haldið áfram og Runukvíslin vaðin á Lambamannavaði og er þá komið á gamla bílaslóð sem gengin var að Þorljótsstöðum þar sem bíllinn beið okkar og var klukkan þá 19:30. Gangan tók 7 klst og 20 mín og vegalengdin 14,1 km. Leiðsögumaður: Hjalti Pálsson frá Hofi. Fararstjóri og myndir: Grétar Grímsson

Hestfjall Nesdalur Kálfskarð Gönguferð FFA á Hestskarðshnjúk og Hestfjall Laugardaginn 10. ágúst klukkan átta lagði lítill en fjallhress hópur göngufólks af stað frá höfuðstöðvum FFA. Haldið var til Siglufjarðar og það skyldi haldið í göngu umhverfis Nesdal milli Siglufjarðar og Héðinsfjarðar. Gönguáætlunin var á þessa leið: Sjá ferðasögu undir Ferðasögur. Una þórey Sigurðardóttir var fararsjóri Frímann Guðmundsson tók myndir.

FFA efndi til ferðar í Seljahjallagil austan Mývatnssveitar þ. 17. ágúst 2013. Ekið var hjá Hverfjalli og stoppað við Nökkvabrekku og við jarðfall Kjartans Kristjánssonar. Þá var ekið suður undir Bláfjallsfjallgarðs og gengið þaðan upp á fjallið og niður í Seljahjallagil. Við gengum upp í stuðlabergsgljúfrið og í syðri arm Seljahjallagils. Eftir það var gengið fram úr gilinu og um Arahvamm norður að bílunum. Veður var skýjað en úrkomulítið. Þátttakendur voru 12, fararstjóri og myndasmiður: Ingvar Teitsson.

Glóðafeykir. 13 manns gengu á Glóðafeykir laugardaginn 24. ágúst á vegum FFA. Rigning og súld var alla ferðina en allir fóru á toppinn þótt blautir væru. Skyggnið lítið þó sást stundum niður á bæi. Á toppnum er komin gestabók og guðaveigar sem bóndinn á Flugumýrarhvammi setti, hafi hann þökk fyrir. Ekki gekk ferðin áfallalaust fyrir sig því einn úr hópnum slaðsaðist á heimleiðinni, fékk grjót á sig sem skar sundur slagæð á úlnlið. Allt fór vel að lokum . Þakka öllum fyrir dugnað og gleði þrátt fyrir blautan dag. Konráð Gunnarsson var fararstjóri og myndasmiður.

FFA efndi til gönguferðar á Gullveginn yfir Mývatnsheiði og Fljótsheiði sunnudaginn 1. sept. 2013. Lagt var upp frá Helluvaði og gengið vestur yfir Helluvaðsgrófir og Óþveginslæk að Laugaseli. Þaðan var haldið yfir Laugagróf að Stafnsholti og svo vestur yfir Kamarlæk að Brenniási. Frá Brenniási var gengið norður að Kálfatjörnum og svo norður Stóraás og niður í Arndísarstaði. Sól og blíðskaparveður var fram eftir degi en síðasta spölinn fengum við suðaustan súld en veðrið var þó hlýtt. Þátttakendur voru alls 7, fararstjóri og myndasmiður Ingvar Teitsson.

Hreppsendaársúlur. Það voru 12 manns sem hófu göngu á Hreppsendaársúlur frá Lágheiði, 9 Íslendingar 2 Finnar og 1 Kinverji. Gengið var sem leið lá upp á hrygginn sunnan Súlnana, þaðan á Lundshnjúk og upp á Syðri-Súluna. Allir nema annar af Finnunum fóru á toppinn. Frá toppnum var útsýni í allar áttir mjög gott. Ekki treystu sér allir að ganga á Ytri-Súluna, og þaðan niður norðurhrygginn. Því tók Karl Stefánsson að sér að fara með þá niður sömu leið, hafi hann þökk fyrir. Gekk ferðin vel niður hrygginn og einnig hjá hinum þótt hægt færu sumir. Enduðum ferðina á Kaffi Klöru. Takk fyrir góða ferð. Myndasmiður og fararstjóri Konráð Gunnarsson.

Haustlitaferð í Jökulsárgljúfur, Hólmatungur - Ásbyrgi Gönguferðin hófst við Hólmártungur en fyrst fórum við niður að Vígabjargarfossi og Kötlum. Víð stöldruðum aðeins við fossana í Hólmártungum en síðan gengum við með Stallánni og óðum að lokum yfir hana sem gaf sveittum tám sæluhroll. Við fengum okkur kaffi við Gloppuklett. Næst héldum við að Kallbjargi en þar kölluðust menn á yfir ána. Einnig var þar kláfur notaður til að senda varning yfir ána. Rétt áður en við komum að Vesturdal sáum við tröllin Karl og Kerlingu við ána. Í Vesturdal fengum við okkur góða hressingu og síðan hófst seinni hluti göngunnar. Við héldum að Hljóðaklettum, gengum meðfram Tröllkarlinum og nokkrir fóru í Kirkjuna. Síðan héldum við að Rauðhólum þar sem var fallegt útsýni yfir það svæði sem við höfðum gengið um. Nú var stefnan tekin þvert yfir Ásheiðina, fórum um Kvíar, Sund, Klappir og komum loks að risavöxnum skessukötlunum ofan við Ásbyrgi. Það þótti mörgum mikilfengilegt að horfa yfir Ásbyrgi en síðan héldum við beint niður með náttúrvættinu að austanverðu og gönguferðinni lauk loks við Gljúfrastofu en þá höfðum við verið um 8 tíma á göngu. Fararstjóri var Örn Þór Emilsson myndir Frímann Guðmundsson.