Ferðir 2014

FFA efndi til árlegrar nýársdagsgöngu þ. 1. janúar 2014. Ekið var að bílastæðinu neðan við Brunná og gengið þaðan austur yfir gömlu brýrnar að bílastæðinu neðan við Knarrarberg. Síðan var gengið sömu leið til baka. Norðan slydda var og lágskýjað en hægur vindur. Þátttakendur voru 5, fararstjóri: Grétar Grímsson, myndasmiður: Ingvar Teitsson.

Áskorun FFA eitt fjall á mánuði hófst í dag með göngu á Leifstaðafell (724m) 24 mættu í gönguna í frábæru gönguveðri logn og hiti um frostmark

Hlíðarfjall. Það var ekki spennandi útivistarveður þennan laugardagsmorgun rigning og þungbúið, enda urðu þátttakendur í færra lagi. En þegar farið er af stað fer slenið af manni. Ekki var hægt að fara á bakka Eyjafjarðarár vegna snjóleysis svo farið var upp í Hlíðarfjall og tekinn hringur þar utan slóða.

Lagt var af stað kl. 9 í skíðaferð og var áætluð ferð upp á Súlumýrar. Ekið var upp að malbikunarstöðinni þar sem færð tók mjög að þyngjast. Snjókoma var og og hitastig um og undir frostmarki. Gengið var af stað í djúpum lausasnjó og færi mjög þungt. Skyggni var lítið og dimmt af þoku uppi í brekkunni. Var þá kafað áfram á skíðunum inn fyrir Hlífárnar þar sem þar sem ákveðið var að snúa við eftir að hafa borðað nestisbita. Þáttakendur í ferðinni voru aðeins fjórir. Fararstjóri og myndasmiður Grétar Grímsson

FFA efndi til þorrablótsferðar í Fjallaborg á Mývatnsfjöllum helgina 15. - 16. febrúar 2014. Ekið var á einkabílum austur undir Vegasveina á Mývatnsfjöllum og gengið þaðan á skíðum suður í skálann Fjallaborg sunnan Stóru-Rauðku, um 8,5 km sunnan vegar. Skíðafæri var ágætt og nægur snjór og sólskin lengst af á laugardeginum. Við skoðuðum umhverfi Fjallaborgar og héldum ágætt þorrablót í skálanum um kvöldið. Daginn eftir var gengið sömu leið norður í bílana. Þá var vestan éljagangur. Eftir kaffidrykkju í Jarðböðunum við Mývatn var ekið til Akureyrar. Þátttakendur alls 9, fararstjóri og myndasmiður: Ingvar Teitsson.

Hreiðar Birgisson sendi ffa þessar myndir sem voru teknar 25. feb 2014 í flugferð yfir Öskju og Dreka.

Midhalstadahals

Ekki var stór hópurinn sem lagði af stað í kveðjuferð í gamla Lamba, veðrið ekki upp á það besta. Í fyrstu var snörp gola en hvessti eftir því sem á morguninn leið og endaði með roki og engu skyggni. Þá var snúið við eftir um 5. ,km barning á móti rokinu.

Jens Bachmann sendi nokkrar myndir úr ferð sem farin um hávetur. Lentu í vondum veðrum og gistu tvær nætur í Botna og þrjár í Bræðrafelli.

Kveðjuferð Lambi 2 Konráð Gunnarsson og Frímann Guðmundsson fóru ferð sem endaði inn í Lamba. Í upphafi átti þetta að vera könnunarferð um hvernig væri að fara á skíðum meðfram Glerá alveg ofaní í gilinu. Þetta reyndist verða topp ferð eins ólik fyrri ferðinni til að kveðja Lamba eins og hugsast gat. Nú skein sól á heiðum himni en í fyrri ferðinni hafði verið rok á móti og skafrenningu svo ekki sá út úr augum. Farið var frá Hálöndum í Hlíðarfjalli og beint inn dalinn og smá saman niður í gilið. Við vorum ekki nema 2.5 tíma inneftir og rúmann klukkutíma til baka. Sett hér inn til gamans. FG

Hamraborgin Ekið var inn að Öngulstöðum og gengið þaðan í átt að Hausnum á Staðarbyggðafjalli. Göngufæri var gott harðfenni, en þegar upp í hlíðina kom var svo hart og hált að allir settu á sig brodda. Upp á Hausinn var á kafla það bratt að bæði þurfti að nota ísexi og línu, en allt gekk þetta nú. Smá stopp var gert við Hausinn en síðan haldið áfram og gengið alla leið á Hamraborgina án vandræða. Niðurferðin gekk vel en aftur þurfti að nota línuna niður af Hausnum. Veður var hið besta sjá myndir. Fararstjóri og myndasmiður Frímann Guðmundsson

Steinmenn Gengið var frá efra bílastæðinu í Kjarnaskógi, upp Kjarnakamb og komið við í Gamla. Síðan upp með lækjunum fyrir ofan Gamla og alla leið upp að Steinmönnum í 500 metra hæð yfir sjávarmáli. Veður var með ágætum logn og hlýtt. Fararstjórn og myndir Frímann Guðmundsson.

Hólsgerði-Bergland-Laugafell Að morgni föstudagsins 4. Apríl var lagt af stað í skíðaferð. Ekið var inn að Hólsgerði innsta bæ í Eyjafirði. Þar voru skíðin tekin fram og gengið fram dalinn framhjá eyðibýlinu Úlfsá og inn að Hafrárgili. Þar var lagt á brattann upp bratta hlíðina þar sem fyrrum félagar í Ferðafélagi Akureyrar eiga margan svitadropann því einar 70 vinnuferðir voru farnar til að búa til veg þarna upp á árunum fyrir 1950. Þarna er komið að Vatnahjallaveg sem er líka nefndur Eyfirðingavegur. Hann var í alfaraleið til Suðurlands upp úr Eyjafirði fyrrum. Neðst í brekkunum er Hákarlatorfa og uppi á brúninni, á hinum eina og sanna Vatnahjalla, er varðan Sankti Pétur. Síðan var haldið meðfram Urðarvötnum, og komið við í Berglandi. Í upphaflegri áætlun var meiningin að fara ekki lengra á fyrsta degi en klukkan var ekki nema rúmlega tvö og allir í fínu formi og laugin og heita húsið í Laugafelli freistuðu, því inni í Berglandi var mun kaldara en úti. Eftir gott stopp ver stefnan tekin á Laugafell skíðafæri og veðrið gat ekki verið betra, kaffistopp var við Geldingarána og um hálf átta var komið í Laugafell. Eftir strangar leikfimiæfingar undir stjórn Ellu var lagst í laugina til að láta líða úr sér, þá var loks komið að matartíma og hraustlega tekið á því til að létta pokana. Um morgunin var ákveðið að stytta ferðina um einn dag og um níu var lagt af stað heimleiðis í smá austan golu sem varð að logni þegar á daginn leið. Heimferðin gekk greitt og komið í bæinn um sjö. Frábær ferð á enda, nokkuð strembin enda tæpir 80 km á skíðum að baki og hækkun upp í 1000 m. Allir komu heim þreyttir og sælir mis brenndir eftir sólríka ferð. Fararstjóri og myndasmiður Frímann Guðmundsson.

Svartárkot Botni Heilagsdalur Mývatn. Veður var hið besta þegar lagt var af stað frá Akureyri áleiðis í Svartárkot innsta bæ í Bárðardal. Meiningin var að fara í þriggja daga skíðaferð um Ódáðahraun og Heilagsdal. Þrátt fyrir mikil hlýindi undanfarna daga var nægur snjór þegar komið var innst í Bárðardal. Skíðafæri var hið besta og um kl sjö var komið í Botna hlýlegan og góðan skála Ferðafélags Akureyrar eftir kaffipásu á Stóruflesju þar sem gangnamannaskáli Mývetninga er. Morguninn eftir var risið snemma úr rekkju því 26 km ganga beið okkar frá Botna í Heilagsdal. Eftir morgunmat og hreingerningu var lagt af stað í heiðskíru veðri og sunnan andvara. Nú tók við ganga milli hraunfláka oftast fannst nú leið á milli en nokkrum sinnum þurftum við að taka af okkur skíðin til að ganga yfir hraunið. Stefnan var á skarð í Bláfjallarananum sem nálgaðist hægt þrátt fyrir nokkurra tíma göngu. Eftir kaffistopp var komið að smá brekku sem í bjartsýni okkar héldum að væri hækkunin upp í skarðið en þegar upp var komið tók við önnur slétta nokkrir kílómetrar en allt hafðist þetta í góða veðrinu. Uppi í skarðinu sat varðmaður (sjá mynd) sem hleypti okkur í gegn. En nú tognaði Vignir íllilega og Heimir var lítið skárri. Eftir að bundið hafði verið um lærið gat hann eða varð að halda áfram og um kl. fjögur var komið að skálanum. En nú tók ekki betra við skálinn var læstur en vegna mistaka var enginn lykill að skálanum með. Í glugga í skálanum var gefið upp símanúmer sem við hringdum í því það var lyklalás á skálanum, en nú tók steininn úr þeir voru með númer sem þeir sögðu að virkaði ekki og engin ráð til að komast inn, ekki var gert ráð fyrir að skíðafólk væri á ferðinni þótt skálinn hafi verið pantaður fyrir þessa ferð. Útilokað var að halda áfram en það er ekki háttur okkar að kalla út björgunarsveit, enda var hún í Borgarfirði en það virtist nú vera það eina í stöðunni, þokan að leggjast yfir og snögg kólnaði. Margra tíma bið virtist vera í aðsígi, eftir 26 km. göngu. En þá kom Heimir bjargvættur, var að fikta í talnalásnum og fékk vinning einn á móti 10.000 og lyklaboxið opnaðist, leiðin var greið. Svona lagað ætti ekki að koma fyrir og er þetta áminning til okkar allra. Eftir gott atlæti í skálanum og góðan svefn var staðan orðin önnur, bólgan hafði rénað hjá þeim Vigni og Heimi, var reynandi að halda áfram enda báðir hörkutól, en ákveðið var að breyta ferðaáætlun og halda niður í Mývatnssveit, það voru um 15 km en 32 km í Svartárkot sem upphaflega var áætlað. Úti var svarta þoka en gengið var eftir snjósleðaförum og vindátt norður Heilagsdalinn. Svo var beygt niður rétt norðan við Seljahjallagil, þar var snjórinn búinn og gengið í Garð í Mývatnssveit um 6 km. Þar kom annar bjargvættur Astrid Magnúsdóttir sem ók okkur í Svartárkot til að ná í bílinn og heim. Eftirminnileg ferð sem fór vel. Vignir Víkingsson var fararstjóri myndir Frímann Guðmundsson .

20140501 Súlur. 30 manns auk fararstjóra gengu á Súlur 1 Maí. Veður og göngufæri eins gott og best gerist. Allir fóru á Ytri-Súlu, einnig gengu allmargir á Syðri-Súlu. Myndatökur Jón Ragnarsson og Linda Björnsdóttir. Fararstjóri Konráð Gunnarsson.

20140510 Kálfsvatn Lagt var af stað frá Strandgötu 23 húsi Ferðafélags Akureyrar kl. 8 laugardaginn 10. maí 2014. Fyrirhugað var að aka til Siglufjarðar og ganga út að Kálfsvatni í samnefndum dal. Um kl. 9 var bílnum lagt við enda flugbrautar í Siglufirði. Gengið var út ströndina að austan um Neðri Skúta, skoðaðar voru rústir síldarverksmiðjunnar en þann 12. apríl 1919 féll gríðarlegt snjóflóð af brúnum Staðarhólshnjúks og Hestskarðshnjúks niður Skollaskál nærri 1000 metrar á breidd og gjöreyddi mannvirkjum Evangersbræðra, húsum og bryggjum. Níu manns biðu bana í snjóflóðinu. Haldið var svo áfram um Staðarhólsströnd að vitanum á Selvíkurnefi og upp Kálfsdalinn að Kálfsvatni sem var undir snjó eins og búast mátti við. Eftir stutt stopp var svo haldið til baka. Myndir, frásögn og fararstjórn Frímann Guðmundsson.

20140610 Hrappstaðaá. Fyrsta gangan í fyrri gönguvikunni. Gengið var upp með Hrappstaðaá í kvöldblíðunni.

20140611 Ytri og Syðri Tunguá Ekið var inn Hörgárdal að norðan inn að Dagverðartungu þar sem gangan hófst. Gengið var upp með Syðri Tunguá þar sem margir fallegir og nafnfagrir fossar eru, alveg upp að Stekkjarhvammsfossi. Síðan gengið til norðus að Ytri Tunguá og niður með henni þar sem hún er í miklu og tilkomumiklu glúfri. Fararstjóri var Karl Stefánson, Frímann Guðmundsson tók myndir og setti texta.

20140622 Húni 11 Þrjár eyjar Ævintýrasigling með Húna II. Þrjár eyjar á sumarsólstöðum. Hollvinir Húna II og Ferðafélag Akureyrar buðu upp á heimsókn í þrjár eyjar með fararstjóra og staðkunnum leiðsögumönnum. Ferðin hófst við Torfunesbryggjuna þar sem farið var um borð í Húna 11. Síðan var siglt út Eyjafjörðinn með viðkomu á Hjalteyri þar sem léttabátur var tekin í tog sem átti að nota við köfun í Grímsey. Siglt var vesturfyrir Hrísey og út fyrir Hrólfsker. Þar var mikið fuglalíf og hvalir létu líka sjá sig. Áfram var haldið í Flatey. Þegar þangað var komið tók á móti okkur Ingvar Sveinbjörsson og byrjað á að ferja okkur í land, gekk síðan um eyna og fræddi okkur um sögu hennar, húsin, lífsbaráttuna og brottfar allra eyjaskeggja 1967 og margt fleira. Síðan var siglt út á Grímseyjarsundið og fór þá báturinn að vagga með tilheyrandi afleiðingum, en áhöfnin á Húna var öll á hjólum í kringum okkur og reyndu eftir föngum að gera líðan ina betri. Til Grímseyjar var komið laust eftir kl. tvö um nóttina. Þar tók á móti okkur höfðinginn Gylfi Gunnarson ný kominn af balli og átti ekki eftir að gera það endasleppt. Dagur tvö: Gylfi var mættur moguninn eftir, nú átti að fara í göngu um Grímsey. Byrjað var á því að fara í fiskvinnsluhús sem Gylfi á og þar er unninn saltfiskur. Síðan var haldið norður eyna og Gengið yfir Norður heimskautsbauginn og haldið áfram meðfram brún bjargsins og endað í þorpinu. Seinna um daginn sigldi Gylfi síðan með okkur kringum eyna í bát sínum Þorleifi. Um kvoldið var svo farið í mat á Kríunni og sungið og skemmt sér. Frábær dagur. Dagur þrjú; Á sunnudeginum var síðan siglt heim með viðkomu í Hrísey. Þar fórum við enn í skemmtilega göngu með undir stjórn Lindu Ásgeirsdóttur leiðsögumanns. Frábær ferð sem vonandi verður endurtekinn. Myndir, Frímann Guðmundsson.

Landafjall Raðganga 2

20140629 Lagt var af stað við Heimari - Hlífá og gengið niður að Gleránni sem var í miklum vexti. Mikill gróður er í öllu Glerárgili og blómabreiður út um allt sem fönguð augað. Ekki var hægt að komast að öllum fossunum sökum vatnavaxta. Fararstjóri og myndasmiður Frímann Guðmundsson og myndir líka frá Kerstin Gillen.

20140707 Kljáströnd

20140709 Knarrarnes og Miðvíkurfoss Fyrst var gengið niður á Knarrarnes sem er innarlega á austurströnd Eyjafjarðar, um það bil beint á móti Hörgárósum, þetta er lítið nes út í fjörðinn, Nesið er nærri mörkum Svalbarðsstrandar- og Grýtubakkahrepps, um miðja vegu á milli bæjanna Garðsvíkur í Svalbarðsstrandarhreppi og Miðvíkur í Grýtubakkahreppi, Fyrrum besta þrautalending við Eyjafjörð. Mordýr hafa fundist þarna þau eru í hópur smádýra sem aðallega lifa í jarðvegi. Þau líkjast skordýrum, teljast til þeirra, hafa sex fætur eins og þau og tvo skynjara á framendanum. En mordýrin eru vænglaus og ýmis sérkenni þeirra tengja þau meira við krabbadýr en skordýr. Síðan var aftur farið í bílana og ekið að Miðvík gengið eftir vegi langleiðina niður í fjöru og svo eftir henni að tignarlegum fossi Miðvíkurfossi. Flestir aka fram hjá þessum stöðum.en það er þess virði að gefa sér örlítinn tíma til að skoða þá. Fararstjóri og myndasmiður Frímann Guðmundsson.

20140710 Krossanesborgir. Það var frískur og föngulegur hópur sem lagði af stað frá Krossanesi út að Lóninu. Gengnar voru fjörurnar og bakkarnir til skiptist, því ekki var fjaran alltaf fær. Enginn var búinn að fara þessa leið nema fararstjórinn. Mikið var um Mávfugl á leiðinni, en lítið af öðrum fugli.Þegar að Lóninu var komið, gengum við upp að Djáknatjörn, þaðan stystu leið í Krossanes. Kvöldganga í góðu veðri,og hressum félagsskap. Myndasmiður og fararstjóri Konráð Gunnarsson.

Fjölmennt var í gönguna upp að Hraunsvatni í fallegu kvöldveðri. Farið var frá Hálsi og genginn hefðbundin leið upp að vatni. Ætlunun var að vaða Hraunsána upp við ósinn en ekki treystu sér allir yfir, nokkrir létu sig hafa það. Hinir gengu til baka og fóru yfir á snjóbrú. Svo mikið var í ánni að hún rann ofan jarðar alla leið niður í Öxnadalsá. Gengum við norðan við vatnið upp í Drangabolla þaðan norður að Kisubrekku, niður undir Hraun þaðan var stefnan tekin að Hálsi. Stikluðum Hraunsána sem gekk vel með hjálp góðra ferðafélaga. Þetta var fjörlegur og duglegur hópur í þessari ferð, sjáumst aftur. Myndasmiður og Fararstjóri Konráð Gunnarsson.

20140712 Bangsahnjúkur Þverfjall Vatnsendahnjúkur. 19 manns auk fararstjóra gengu á Bangsahnjúk Þverfjall og Vatnsendahnjúk. Farið var úr Héðinsfirði og hófst gangan rétt við göngin. Héldum sem leið lá upp í Möðruvallaskál, með viðkomu í eyðibýlinu Grund. Er upp í skálina var komið gengum við á snjó alla leið upp í skarð. Áðum þar og nutum góða veðursins. Gengum á Bangsahnjúk að hluta í snjó, á tindinum var autt. Nutum þar útsýnis og kíktum í nestið.Niður af hnjúknum var gengið á auðu og langleiðina á Þverfjall. Á Þverfjalli var mikill snjór sem mjög gott var að ganga á. Af Þverfjalli gengum við á snjó yfir á Vatnsendahnjúk og þaðan nánast á snjó niður á jafnsléttu. Ferðina niður af hnjúknum fór mannskapurinn ýmist á rassinum gangandi eða á fótskriðu. Frábær ferð með hressu duglegu og jákvæðu fólki. Veðrið lék við okkur allann tímann sól og blíða. Myndasmiður og fararstjóri Konráð Gunnarsson.

Í ágætis gönguveðri var lagt af stað í gönguferð að Burstabrekkuvatni. Gengið var upp sunnan ár að mestu eftir véla eða bílaslóð. Ekki var langt upp í snjófannir í dældum og giljum en þegar komið var að vatninu var það að mestu undir snjó og ís nema innsti hlutinn þar sem áin rennur í vatnið. Eftir góðan nestistíma sunnan við vatnið var afráðið að ganga kring um vatnið (!) og var ú ganga nánast öll á snjó. Grjótstífla er við neðri enda vatnsins sem gerð var þegar sett var upp virkjun neðar í ánni. Lá nú leiðin yfir stífluna og síðan niður vegslóðina til baka. Þáttakendur voru 9 talsins auk fararstjóra. Fararstjóri og ljósmyndari : Grétar Grímsson

2014 Sjö tinda ferð Lagt var af stað upp úr níu á hæsta fjall við byggð á Íslandi, Kerlingu í Eyjafirði (1538 m). Og þaðan átti að ganga norður eftir tindunum Hverfanda, Þríklökkum, Bónda, Litla Krumma, Stóra Krumma, Syðrisúlu og Ytrisúlu, síðan niður í Glerárdalinn þar sem ferðin endar. Veðurspáin var ekki of hagstæð það átti að verða lágskýað þegar liði á daginn. Á uppleiðinni lagðist þokan yfir topp Kerlingar og þegar upp var komið var svarta þoka og ekkert útsýni. Á niðurleiðinni missti ein úr hópnum fótanna í snarbrattri brekkunni niður af Kerlingu og þetta var á versta stað í farveg skriðu sem hafði fallið niður og stórir grjóthnullungar voru á ferð hennar niður. Allar ráðleggingar um að snúa sér voru gleymdar. Natalía rann niður með höfuðið á undan og lenti á hverju grjótinu á eftir öðru. Viðar Sigmarsson stökk eins og köttur á eftir henni og tókst að stöðva för hennar niður. Í fyrstu virtist hún rotuð en en svo reis hún upp og eftir skoðun reyndist hún nánast ómeidd aðeins nokkrar skrámur. Þarna fór betur en á horfðist. Síðan var haldið áfram en alltaf versnaði veðrið, brátt var komin helli rigning ofan á þokuna. En allt hafðist þetta hópurinn góður og samstilltur, enda voru við orðin fjögur sem aðstoðuðu. Einar Sigurjónsson fór fyrir hópnum vanur maður hafði farið 24 tindana tveim dögum áður og auk hans Viðar Sigmarsson Sigurlína Jónsdóttir og Frímann Guðmundsson. Frímann Guðmundsson tók myndirnar.

Frábær dagur á Glerárdal í dag. Gönguferði í Lamba á vegum FFA 13 manns tóku þátt í frábæru veðri. Nokkuð mikið í lækjum en allt hafðist þetta og kaffi hitað í Lamba. Fararstjórar Stefán Sigurðsson og Ingimar Árnason.

FFA efndi til ferðar á Öskjuveginn 25.-29. júlí 2014. Ekið var í Dreka og gengið vestur í Öskju daginn eftir þar sem skriðan mikla í Suðurbotnum blasti við. Einnig var komin stór fjara við Bátshraun og Víti og lítil fjara í Víti þar sem flætt hafði inn. Daginn eftir var gengið um Jónsskarð í ágætu veðri í Dyngjufell. Þaðan lá leiðin síðan í Botna og áfram um Suðurárbotna í Svartárkot. Þátttakendur voru 11 að fararstjóra meðtöldum. Fararstjóri og myndasmiður: Ingvar Teitsson.

20140920 Reistarárskarð Ekið var út að Freyjulundi og þaðan var gengið upp með Reistaránni og upp og í gegnum skarðið og þaðan upp á Reistararfjallið. Útsýnið var mjög takmarkað vegna gosmisturs sást varla yfir fjörðinn. Ekki var dvalið lengi uppi heldur farið austuraf fjallinu og niður. Seinni göngur stóðu yfir en við lentum aftan við reksturinn og niður. Gott veður var að öðru leiti og allt gékk vel. Myndasmiður og fararstjóri Frímann Guðmundsson.

20141004 Núpufellshnjúkur

20141115 Hálshnjúkur Lagt var af stað frá Efri Vöglum um kl. 10 í þurru veðri og var nokkur vindur af austri og hiti 5 stig. Gönguleiðin á fjallið var mikið til á snjólausri slóð en einstöku skaflar. Þegar komið var upp á hnjúkinn eftir 1 klukkustund og 20 mín. var vindur all hvass af austri og nokkur ský á ferð. Við sáum bæði til Fnjóskadals og yfir Dalsmynnið og á Draflastaðafjall þangað sem farið verður í næstu ferð. Gangan niður af fjallinu var þægileg og vorum við komin kl. 12:10 að Efri Vöglum. Vegalengd upp á Hálshnjúkinn mældist 2,2 km. Fararstjóri var Grétar Grímsson, Myndir tóku Grétar, Frímann og Kristrún Linda.

Síðasta ferðin á áætlun Ferðanefndar FFA árið 2014 var farin á Draflastaðafjall laugardaginn 6. des. 2014. Ekið var upp á Víkurskarð og gengið þaðan norður úr skarðinu og upp á hæsta hnjúk Draflastaðafjalls (734 m). Töluverður lausasnjór var og þungt færi upp brekkurnar. Frá vörðunni efst á fjallinu var gott útsýni í allar áttir. Allhvasst var af suðvestri með skafrenningi uppi á háfjallinu en mun betra veður niðri í brekkunum. Við vorum 1 klst. og 20 mín. upp að vörðunni. Þátttakendur voru alls 8, að fararstjóra, Gunnari Halldórssyni meðtöldum. Myndasmiður: Ingvar Teitsson.

Um kl 9 á sunnudagsmorgni var gengið af stað frá Draflastöðum áleiðis í Skuggabjargaskóg. Við sumarbústaðinn á Melum bættust nokkrir ferðalangar í hópinn ásamt hundinum Krumma. Logn var og bjart veður fyrir utan gosmóðuna frá Holuhrauni. Gengin var efri leiðin eftir vegslóðinni ofan við skógræktarreitina og var útsýni ágætt yfir skógræktasvæðið sem skartaði sínum fallegu haustlitum. Um hádegisbilið var komið að bæjarrústunum á Skuggabjörgum þar sem tekið var upp hádegisnestið. Eftir 4 tíma og korter var komið niður á bílastæðið á Laufási þar sem einn bíll var geymdur til að sækja bíla í Draflastaði. Gengin vegalengd mældist um 15 km og voru þáttakendur alls 16. Fararstjóri var Grétar Grímsson og ljósmyndarar voru Grétar Grímsson og Snjólaug Gestsdóttir