Ferðir 2021

Árleg nýársganga FFA var 1. janúar 2021 kl. 13. Hún var vel sótt að þessu sinni eða 25 manns í heildina. Veðrið var alveg einstakt, logn og frost með tilheyrandi birtustigi á himnum. Gengið var um Krossanesborgir. Fararstjóri var Grétar Grímsson og myndirnar tók Þorgerður Sigurðardóttir.

Gengið inn og upp Skútudal að fjallshryggnum sem skilur að Skútudal og Hólsdal. Tekin var nestispása undir uppgönguskarðinu. Haldið rakleiðis til austurs skammt frá Presthnjúk og eftir hryggnum áleiðis í Hólsskarð. Skíði með stálköntum voru nauðsynleg. Af hryggnum var gott útsýni til margra tinda á utanverðum Tröllaskaga. Frá skarðinu var ágætis rennsli, en nokkuð hart í byrjun, niður í botn Ámárdals. Eftir stutt stopp í dalbotninum var gengið áleiðis í skarðið milli Ámárhyrnanna fremri og efri. Haldið var hæðinni í botni Héðinsfjarðar eftir hefðbundinni leið og stefnt á Möðruvallahálsinn. Af hálsinum var gott rennsli og færi niður að hól ofarlega í botni Skeggjabrekkudals og þar var áð. Að lokum renndi hópurinn sér niður dalinn norðan megin Garðsár í átt að Golfskálanum. Farið var yfir tvö stór snjóflóð sem fallið höfðu nokkrum dögum áður. Fararstjóri var Björn Z Ásgrímsson hann tók myndirnar.

Góð þátttaka var í fyrstu jógaferð FFA. Þuríður Helga Kristjánsdóttir og Tinna Sigurðardóttir leiddu þessa göngu. Gengið rólega og í kyrrð um skógareitinn í Garðsárdal. Stoppað nokkrum sinnum til að hugleiða, gera jógaæfingar, njóta og hlusta á náttúruna. Þuríður Hegla las líka nokkur frumsamin ljóð m.a. um áhrif náttúrunnar á manneskjuna. Myndir, Þorgerður Sigurðardóttir

Lagt var af stað úr Löngulaut ofan Dalvíkur og gengið á skíðum fram Böggvistaðadal upp í dalbotninn þar sem Mosi, skáli Ferðafélags Svarfdæla stendur í um 750 m hæð. Veður var þokkalegt og skíðafæri gott en vildi klessast neðan í. Vorum 7. Fararstjóri Sveinn Torfason hin besta ferð.

Ekið var með rútu austur í Mývatnssveit. Farið umhverfis vatnið og stoppað víða þar sem sást til fugla. Stoppað var við Álftabáru, Skútustaði, Höfða, Neslandavík og Vagnbrekku. Ekið um Víkurskarð og Svalbarðsströnd. Farið niður á Svalbarðseyri og stoppað við Tungutjörn. Síðan var ekið suður Eyjafjörð að Laugalandi, þar yfir að Hrafnagili og til Akureyrar. Ferðin var afar vel heppnuð og var met slegið í fjölda fuglategunda sem sáust í ferðinni eða alls 52 tegundir. Þátttakendur voru 15 með fararstjórum. Fararstjórar voru Jón Magnússon og Sverrir Thorstensen. Myndirnar tóku Guðrún Eggertsdóttir og Margrét Kristín Jónsdóttir.

Fyrsta barna- og fjölskylduferð ársins var 19. maí kl. 17. Fyrirhugað var að fara í Naustaborgir en sökum framkvæmda þar þá var lítið að sjá. Því var farið að Kristnestjörn í Eyjafirði. Þrátt fyrir frekar kalsalegt veður þá mættu 14 börn með foreldrum sínum eða afa og ömmu. Jón Magnússon og Sverrir Thorstensen sáu um að fræða börnin um fluglana sem sáust og benda þeim á áhugaverða fugla. Foreldrar og afar og ömmur voru ekki síður spennt. Jón og Sverrir voru með sérstaka sjónauka til að skoða fugla og þótti börnunum það spennandi. Mörg barnanna skráðu hjá sér hvaða fuglategundir þeir sáu. Við þökkum Jóni og Sverri fyrir skemmtilega ferð. Myndir Þorgerður Sigurðardóttir og Fjóla Kristín Helgadóttir..

Árleg hjóla- og gönguferð. Að þessu sinni var farið í Mývatnssveitina. Fararstjórar voru Ingimar Árnason og Stefán Sigurpsson. Myndirnar fengum við að láni hjá Frímanni Guðmundssyni.

Mikil þátttaka var í ferðinni að fara þurfti tvær ferðir því ekki komust nema 18 manns í bátin í hverrri ferð. Ekið var til Hofsóss þaðan sem siglt var út í Málmey með Drangey tours en leiðsögumaður frá þeim fræddi fólk um fuglalíf, sögu og náttúruna í eynni. Farið var í útsýnissiglingu að Þórðarhöfða þar sem er stórkostlegt stuðlaberg auk þess sem Drangey er einnig í sjónmáli. Fararstjóri var Herdís Zophoníasdóttir. Myndirnar tók Sigríður Stefánsdóttir og Frímann Guðmundsson.

Fyrsta viðbótarferð sumarsins var gönguferð um galmaströnd. Frímann Guðmundsson fararstjóri þekkir vel til og leiddi hópinn mjög skemmtilega leið. Veðrið lék við þátttakendur og var mikil ánægja með þessa ferð. Myndirnar eru frá Frímanni Guðmundssyni.

FFA er að þróa barna- og fjölskyldustarf innan félagsins. Gönguferð í Mývatnssveit var ein af fimm ferðum sumarsins. Veðrið lék við þátttakendur sem voru heldur fáir. Dimmuborgir og Hverfjall var meðal þess sem gert var. Fararstjar voru Herdís Zophoníasóttir og Fjóla Kristín Helgadóttir sem tók myndirnar.

Góð ferð var farin á Grasárdalshnjúk laugardaginn 12. júní. Ferðin tókst vel, veður gott og voru þátttakendur 12 að fararstjóra meðtölum en það var Viðar Örn Sigmarsson sem leiddi hópinn upp. Myndasmiðir voru Viðar Örn Sigmarsson og Arnar E. Helgason.

Ferð á Múlakollu á þessum árstíma er að verða að árlegum viðburði hjá FFA. Að þessu sinni tilheyrði gangan gönguviku 2021. Í fyrra þurfti að vísu að aflýsa göngunni vegna jarðskjalfta en í ár fóru þau Einar Bjarki Sigurjónsson og Christina Finke með hópinn. Ferðin gekk vel og fengu þau gott veður á leiðinni. En þegar upp kom var orðið skýjað. Myndirnar tók Christina Finke.

Sólstöðuganga í Hrísey tilheyrði gönguviku 2021, þátttaka var mjög góð eða tæplega 50 manns. Fararstjóri var Jóhannes Áslaugsson og honum til aðstoðar Marína Sigurgeirsdóttir eiginkona hans. Jóhannes tók á móti okkur í Hrísey og var ferðinni heitið norður að vitanum þar sem sólarlagið nýtur sín best. Veðrið gat ekki verið betra, logn og sólin skein. Haldið til baka með síðustu ferju kl. 23. Myndirnar tók Þorgerður Sigurðardóttir.

Í gönguviku í júní 2021 voru þrjár fossagöngur sem séra Svavar A. Jónssn stýrði. Hann gaf út bókina „Gljúfrabúi og giljadísir árið 2020. Bókin er byggð upp af myndum af fossum og er tilgangur bókarinnar að vekja athygli á fossum í nánasta nágrenni okkar. Svavar valdi fossa í nánasta nágrenni okkar. Mjög góð þátttaka var í öllum þremur ferðunum. Myndirnar hér eru frá göngunni í Myrkárdal og tók Þorgerður Sigurðardóttir þær. Ef einhver á myndir úr hinum fossagöngunum væri vel þegið að fá þær hér inn.

Ferðinni var seinkað um einn dag vegna mikils roks. Sunnudaginn 27. júní var síðan mjög gott veður og lagt var af stað kl. 8. Fararstjóri og leiðsögumaður var Sigurveig Árnadóttir jarðfræðingur sem sagði frá rannsóknum á Torfufellseldstöðinni og kenndi þátttakendum að lesa jarðfræðina úr landslaginu. Myndirnar tók Árni Ólafsson og Þorgerður Sigurðardóttir.

Náttúruskoðun í Krossanesborgum er þriðja ferðin á árinu sem FFA setur upp og sérstaklega er ætluð börnum og sniðin að þeirra þörfum. Í ferðinni voru virkilega áhugasöm börn með foreldrum og afa og ömmu. Brynhildur Bjarnadóttir fræddi börnin um lífið í náttúrunni og benti þeim á margt sem þau taka oftast ekki eftir sjálf. Myndir Árni Ólafsson.

Gengið var frá Fremstafelli norður með Skjálfandafljóti um Barnafell, Barnafoss skoðaður og þar sagði fararstjóri frá. Þá var gengið ofan við gljúfur Skjálfandafljóts í Fellsskóg og þaðan út í Ljósvetningabúð. Fararstjóri og myndasmiður var Ingvar Teitsson.

Að venju var góð þátttaka í sjö-tindaferð FFA og ekki spillti veðrið fyrir að þessu sinni. Byrjað var á Kerlingu (1538 m ) og síðan var hver tindurinn af öðrum sigraður: Hverfandi (1320 m), Þríklakkar (1360 m), Bóndi (1350 m), Litli Krummi, Stóri Krummi, Syðri-Súla (1213 m) og Ytri-Súla (1143 m) Einar Bjarki Sigurjónsson, Christina Finke (Tina) og Baldvin Stefánsson voru fararstjórar.

Ferð í Seldal með Árna Gíslasyni sem er frá Engimýri og þekkir vel til enda var mikil ánægja með hans leiðsögn í ferðinni. Gengið var frá Bakkaselsbrekku og eftir gönguslóðum niður að gamla Bakkaseli. Síðan var gengið eftir áreyrunum fram að hólmunum. Á leiðinni er margt áhugavert að sjá í þessum eyðidal og sagði Árni frá. Þegar komið er á flatann innan við brekkurnar opnast útsýni inn dalinn, ármótin og fram yfir Þorbjarnartungur. Myndirnar tóku Árni Gísalason og Fjóla Kristín Helgadóttir.

Fjórir fossar í Bárðardal voru skoðaðir. Fyrst var það Hrafnabjargarfossar síðan var gengið niður með Skjálfandafljóti að Ingvararfossum og Aldeyjarfossi. Fararstjórn og myndir Ingvar Teitsson..

Efnt var til afmælisraðgöngu hjá FFA í tilefni af 85 ára afmæli félagsins. Alls voru göngurnar fjórar. Fyrsti leggurinn var frá Akureyri yfir í Fnjóskadal, yfir Bíldsárskarð og leiddi Ólafur Kjartansson þá göngu. Önnur gangan var eftir Fnjóskadalnum og sú þriðja frá Fnjóskadal yfir í Bárðardal. Báðar þessar göngur leiddu þau Ósk Helgadóttir og Hermann R. Herbertsson. Síðasti leggurinn var frá Bárðardal yfir í Mývatnssveit og leiddi Ingvar Teitsson þá göngu. Góð þátttaka var í göngunum og veðrið hið besta. Einn þátttakandi fór alla fjóra leggina og hlaut viðurkenningu fyrir. Myndirnar tóku Birgit Schov og Þorgerður Sigurðardóttir.

Fyrsta veiðiferðin var farin að Hraunvatni og gekk í alla staði afar vel. Flugan var reyndar svolítið erfið en börnin létu það merkilega lítið á sig fá. Fararstjórn og myndir Herdís Zóponíasdóttir.

Ekið að Ytra-Hóli í Fnjóskadal og að Hólsá. Gengið austur Gönguskarð. Farið í um það bil 500 m hæð á vatnaskilum. Vaða þurfti tvær ár á leiðinni. Seinni hluta ferðarinnnar, þegar kom yfir skarðið var þoka. Fararstjórn og myndir Ingvar Teitsson.

Ekið að bílastæði við Leirhnjúk norðan Kröfluvirkjunar. Fyrst var gengið að sprengigígnum Víti og þaðan að Leirhnjúk. Frá Leirhnjúk var fylgt stikaðri leið til Reykjahlíðar sem fylgir að mestu hrauninu frá 1727 sem kallast Eldá. Leiðin lá við suðurrætur Hlíðarfjalls. Fararstjórn og myndir Þuríður A. Hallgrímsdóttir.

Lagt var af stað frá bílastæðinu ofan við skotsvæðið á Glerárdal og gengið þaðan eftir stíg að Glerárstíflu og hún skoðuð. Farið var yfir brúna á stíflunni, upp á Lambagötuna og eftir henni niður að gömlu göngubrúnni á Gleránni og að bílunum. Fararstjórn og myndir Ingvar Teitsson.