Ferðir 2010

Ferðafélag Akureyrar efndi til nýársdagsgöngu þ. 1. jan. 2010. Gengið var frá bílastæði neðan við Kjarnaskóg suður fyrir enda Akureyrarflugvallar og yfir gömlu brýrnar á Eyjafjarðará austur að þjóðveginum neðan við Kaupang. Síðan var gengið sömu leið til baka. Blíðskaparveður var, en hörkufrost, -18°C. Þátttakendur voru 10, fararstjóri: Grétar Grímsson, myndasmiður: Ingvar Teitsson.

FFA efndi til árlegrar þorrablótsferðar í Botna við Suðurárbotna helgina 13.-14. feb. 2010. Ekið var í Svartárkot og gengið þaðan upp með Suðurá í Botna. Snjólítið var og skíðin því skilin eftir heima. Hópurinn átti ágætt kvöld í Botna við söng, upplestur, leikflutning og stjörnuskoðun, að mat og drykk ógleymdum. Suðvestan gola var á laugardaginn og fram eftir morgni á sunnudeginum en snerist í norðanátt undir lok ferðarinnar. Þátttakendur voru alls 7, fararstjóri og myndasmiður: Ingvar Teitsson.

Gengið var frá bílastæði efst á Víkurskarði og upp á fjallið, skíðafæri var blautt og vildi klessast neðan í á uppeftirleiðinni. Þegar upp var komið var skyggni lítið sem ekkert, allt hvítt himinn jörð og haf, en veður stillt og gott. Þrátt fyrir allt var þetta hin skemmtilegasta ferð enda góður hópur á ferð. Fararstjóri: Gunnar Halldórsson, myndasmiður Frímann Guðmundsson.

Gengið var upp Vatnahjalla fyrst eftir gamla veginum og svo upp á þann nýja. Veður var milt og gott en í miðri hlíðinni var gengið í gegn um þokubelti. Áð var við Santi Pétur og matast. Síðan var að mestu fylgt varðaðri leið og gengið í gegnum Gullna hliðið. Komið var í Bergland við Urðarvötn um kl. 19:00 eftir um 5 klukkutíma rölt. Notið dvalarinnar um kvöldið og gist. Á sunnudegium var kominn norðan hvessingur með skafrenningi. Þá var farin bein leið að Santi Pétri í gegnum sortann með engu skyggni. Þaðan haldið niður Vatnahjalla og að bílnum. Fararstjóri og myndasmiður Frímann Guðmundsson

Gengið var á Hvassafellsfjall 10. apríl 2010. Sex manns voru með í för og gekk ferðin afar vel. Ágætis gönguveður var, skúrir við og við í byrjun ferðar en annars þurrt. Ekki var vindur mikill þó vindhviður áttu til að stríða okkur. Ágætis útsýni var til nærliggjandi fjalla en sást ekkert lengra til og erfitt myndaveður.

Ekið var á tveimur bílum yfir Fljótsheiði og norður Reykjadal. Þaðan beygt upp Hvammana hjá Laxárvirkjun og inn á Kísilvegin þar var annar bíllinn skilinn eftir við afleggjaran upp að Þeisrareykjum. Áfram var farið á hinum bílnum um Mývatnssveit yfir Námaskarð að Klaustri á Mývatnsöræfum, rétt vestan við leiðina niður í Hólmatungur. Klukkan var að verða 9:30 þegar skíðin voru sett undir og gengið norður að Hlíðarhaga og ekki mátti snjórinn vera minni sumstaðar Eftir góða hvíld í Hlíðarhaga var haldið út á Eilífsvötn í góðu skíðafæri. Gengið var upp hlíðina norðan við Hágangnahala norðan Hrútfjallarana. Eftir kaffistopp var gengið norður gjástykki í gegnum apalhraun en sem betur fer var snjórinn nægur til að þræða á milli hraunstrýtanna. Nú var stefnan tekinn á Víti og farið upp Gjástykkisvegginn sem er þarna mjög hár en góð leið upp rétt norðanvið þar sem hann er hæstur. Haldið áfram að Litla-Víti og Stóra-Víti skoðað. Ekki var komið að Þeistareykjum fyrr en um kl 9:30. Það var þreyttur og slæptur hópur sem hlakkaði mikið til að koma í hlýjuna í Þeistareykjaskálanum og gist þar. En þegar inn var komið var skálinn ískaldur og var gasið búið líka? Þvílik vonbrigði. Sem betur fer voru allir með þurr föt og eitthvað var eftir að gasinu. Eftir litla næringu með glamrandi tönnum var farið í öllum fötunum ofan í pokanna. Næsta dag var gengið að Kísilveginum. Þetta er stórkostleg gönguleið og frábært útivistarsvæði sem svíkur engan.

Þetta var hin árlega gönguferð FFA á Súlur. Vorum verulega heppin með veðrið, glampandi sólskin og stillt. Göngumenn voru í upphafi 17 talsins. Þrír sneru við. Færið var þokkalegt, fimm skíðamenn í hópnum. Göngutími 5.30 klst. Prýðileg ferð. Fararstjóri Frímann Guðmundsson.

Gengið var upp með Stóralækjargili í Öxnadal. Góð mæting var í frábæru veðri.

Gengið var upp með Reykjá í Eyjafirði. Mjög góð þátttaka var. Fararstjóri var Frímann Guðmundsson. Ljósmyndir tóku Frímann Guðmundsson og Maximilian.

20100610 Mjög skemmtileg kvöldganga eftir og ofan í Þverárgili í austanverðum Eyjafirði. 19 manns tóku þátt og höfðu gaman af. Myndir tók Konráð Gunnarsson

Gengið var upp með gilinu við Syðri Tunguá í Hörgárdal og skoðað fossa. Gengið var svo niður með gilinu við Ytri Tunguá. Fararstjóri var Konráð Gunnarsson. Ljósmyndir tók Lilja Guðmundsdóttir og Konráð Gunnarsson.

Frábær kvöldferð í Hörgárdal. 51 þátttakandi ásamt fararstjóranum Frímanni Guðmundssyni. Roar Kvam tók myndirnar.

Gengið var á Hólafjall frá Þormóðsstöðum í Sölvadal. Gengið var upp hlíðana með vegslóða og upp á fjallið að vörðu sem þar er. Myndir tók: Una Þórey Sigurðardóttir

Mjög áhugaverð kvöldferð í Eyjafirði. 32 þátttakendur ásamt fararstjóranum Konráð Gunnarssyni. Roar Kvam og Konráð Gunnarsson tóku myndirnar.

Fararstjóri var Bjarni E Guðleifsson. Roar Kvam tók myndirnar

Látraströnd. Sigling og gönguferð Ekið út á Grenivík. Siglt þaðan út að Látrum. Farin verður kvöldganga upp í Uxaskarð. Gist verður í húsi eða tjöldum. Gengið inn Látraströnd næsta dag. Fararstjóri: Gunnar Halldórsson.

Tíu manna hópur ásamt fararstjóranum Ingimar Eydal labbaði meðfram Glerá í mjög góðu veðri. Frábær gönguferð innanbæjar á Akureyri. Roar Kvam tók myndirnar.

Það voru fáir sem skráðu sig á réttum tíma í ferðina. Ég mætti á skrifstofuna kl. 18:30 og þar voru mættir fjórtán sem ætluðu með. Það voru svo tveir sem bættust við í Ólafsfirði. Við vorum því sextán sem héldum á fjallið í góðu veðri. Ferðin upp gekk vel og sáum við mjög víða. Upp vorum við kl. 23:30 allir hreissir og kátir. Heimferðin gekk mjög vel. Gunnar Halldórsson.

Laugardaginn 17. júlí 2010, héldu 14 óhræddir, ævintýraþyrstir, fjallasjúkir og öllu viðbúnir göngugarpar frá brúnni við Grenjá af stað upp á Kaldbak í Eyjafirði. Hugmyndin var að ganga öll fjöllin frá Kaldabak norður að Gjögurfjalli, alls 16 tindar. Áætlaður göngutími var um 20 klst. 10-15 metra skyggni var á okkur nánast allan tíman en þó lítil bleyta og vindur. Fararstjórinn þurfti að hafa sig allan við að rata rétta leið í þokunni og var því lítið um sögur og söng á leiðinni. Huggun harmi gegn hélt einn tónelskur stuðinu uppi með afar fjölbreyttu og fögru blístri sem ómaði um tinda Látrastrandar með miklum fögnuði viðstraddra og þegar sá hinn sami var ekki að blístra, bauð hann upp á nýuppáhellt pressukönnukaffi. Eina almennilega skyggnið á leiðinni var á Uxaskarði, en þá vorum við á milli skýjalaga og var skýlaust í 300 til 500 metra hæð, þokubakki niðri og lágský fyrir ofan okkur. En eftir að hafa gengið á 16 tinda á 17 klukkustundum og 15 mínútum og hækkað okkur samtals um 3200 metra komum við niður í Látur og skömmu síðar komin í bátsferð til Grenivíkur þar sem ferðinni lauk. Flestir voru á því að þessi ferð skyldi endurtekin í betra skyggni. Myndasmiðir eru Viðar Sigmarsson og Sólveig Haraldsdóttir.

FFA efndi til ferðar á Öskjuveginn 16.-20. júlí. Ekið var að Drekagili á föstudagskvöldið og í leiðinni var farið í stutta skoðunarferð um Herðubreiðarlindir. Laugardaginn 17. júlí var lágskýjað en þurrt. Þá var farið að Svartá við Vaðöldu, í Nautagil og Drekagil og einnig gengið inn í Öskju að Víti og Knebelsvörðu. Sunnudaginn 18. júlí var gengið frá Öskjuopi yfir Jónsskarð í Dyngjufell. Þá birti til og var frábært veður það sem eftir var ferðarinnar. Þann 19. júlí var gengið í Suðurárbotna og daginn eftir í Svartárkot. Fararstjóri og myndasmiður: Ingvar Teitsson.

Gengið var á Torfufell inn í Eyjafirði 24. júlí 2010. Tíu voru með í för auk fararstjóra og var veður með besta móti. Gengið var upp norðurhrygg fjallsins og niður í Villingardal. Myndir tók Grétar Grímsson

Ferð FFA á Grasárdalshnjúk 26. júní 2010 Að morgni laugardagsins 26. júní, lagði vaskur hópur kvenna og karla frá Ferðafélagi Akureyrar upp í gönguferð frá Reykjum í Hjaltadal. Markmið ferðarinnar var að ganga á Ytri-Grasárdalshnjúk 1264 m og einnig Reykjanibbu 1302 m. Fararstjóri var Una Sigurðardóttir.

Lagt var af stað frá Akureyri um kl. 16:00 mánudaginn 26. júlí. Þær fréttir höfðu borist að ófært væri um Herðubreiðalindir og vegurinn lokaður þar sem Jökulsá á fjöllum væri í vexti og flæddi upp í Lindá og vaðið væri svo djúpt að engum væri fært. Því var farið austur fyrir Jökulsána og upp hjá Grímstöðum á Fjöllum. Bílstjórinn hafði á orði að sér fyndist vegurinn góður fjallavegur þótt öllum öðrum í rútunni fyrndist nóg um endalaus þvottabretti. Allt gekk þetta þó og um kl. 22:00 var komið í Dreka. Fararstjóri Frímann Guðmundsson.

Gengið var á Blástakk, Blekkil og ónefnt fjall og Sörlatungufjall. Lagt var af stað úr Barkárdal í þoku en létti fljótt til. 9 voru með í för og tókst ferðin vel. Veðrið var mjög gott og frábært skyggni. Myndir tók Konráð Gunnarsson

Ekið var í Herðubreiðarlindir föstudagskvöldið 6. ágúst. Morguninn eftir var Herðubreið á kafi í þoku. Því var ekið upp í Öskju og gengið inn að Víti. Síðan var farið í Drekagil og Nautagil. Um kvöldið var farið í göngu um Herðubreiðarlindir. Á sunnudagsmorguninn var Drottningin enn hulin þoku. Var þá ekið heimleiðis og stoppað í Hrossaborg. Eftir það var farið að Sæluhúsinu við Jökulsá, Klaustri á Mývatnsöræfum og fuglasafninu í Ytri-Neslöndum. Fararstjóri: Ingvar Teitsson, myndasmiður: Konráð Gunnarsson.

Ekið var að bænum Syðri-Bægisá í Öxnadal og fengið leyfi hjá bóndanum að ganga inn dalinn sem er um 10 km langur og gljúfrin og fossarnir skoðaðir í leiðinni. Smá hrollur var í fararstjóranum að ganga yfir Bægisárjökulinn sem hann hafði ekki farið áður yfir og var búinn að fá fregnir af að jökullinn væri sprunginn. Þegar sást til jökulsins virtist hann snarbrattur uppgöngu, en þegar nær dró var þetta missýning. Gangan yfir jökulinn reyndist létt og engar sprungur. Ekki var farið á Tröllahyrnu að þessu sinni þar sem þoka var á fjallinu heldur beint niður í Glerárdalsbotn. Farið var niður snarbratta fönn, þar læddist aftan að okkur steinn á fljúgandi ferð og þaut í gegnu um hópinn en hitti engan sem betur fór, margt er að varast á fjöllum. Síðan var vaðið yfir Glerá og að Lamba. Þaðan farið niður um Grenishóla yfir Lambá niður Bungur og heim að réttinni þar sem Súluvegurinn endar. Erfið ferð á enda þar sem farið var um stórbrotið landslag, gljúfur, fossa, jökul, há fjöll, útsýni, vaða ár, Hvað er hægt að fá meira út úr einni ferð. Fararstjóri og myndasmiður Frímann Guðmundsson.

Gangan hófst við Þverárrétt í Öxnadal. Gengið er inn mynni Þverárdals og stefnan sett fljótt í austur upp Landárdal. Gengið er upp botn Lambárdals upp skálina milli Kistufjalls og Jökulborgar og þaðan á toppinn. Af toppi Jökulborgar er mjög flott og mikið útsýni. Fararstjóri var Grétar Grímsson og myndasmiður Magnús.

FFA efndi til aðventuferðar á slóðir Fjalla-Bensa helgina 4.-5. des. 2010. Þá voru 85 ár liðin frá eftirleitarferðinni sem Gunnar Gunnarsson hafði sem fyrirmynd að skáldsögunni "Aðventu." Ekið var að Péturskirkju og síðan að Sæluhúsinu við Jökulsá á Fjöllum. Síðan var ekið áleiðis í Herðubreiðarlindir og stoppað á leiðinni við Tumba í Miðfelli. Hópurinn gisti í Herðubreiðarlindum í góðu yfirlæti. Morguninn eftir var ekið heimleiðis norður öræfin og heim. Gott veður var á laugardaginn, suðvestan gola og sólskin öðru hvoru. Á sunnudaginn var norðan mugga. Þátttakendur voru 11, fararstjóri og myndasmiður: Ingvar Teitsson.