Reykjahlíð – Dimmuborgir

Stóragjá – Grjótagjá – Hverfjall – Dimmuborgir 

Brottför kl. 9 á einkabílum frá FFA, Strandgötu 23.
Fararstjóri: Ingibjörg Elín Jónasdóttir
Verð: 3.500/2.000.  Innifalið: Fararstjórn.

Gangan  hefst við upplýsingamiðstöðina (Mývatnsstofu) í Reykjahlíðarþorpinu. Gengið eftir slóðum og stígum alla leið en á köflum eru þeir grófir og ójafnir þannig að gott getur verið að hafa göngustafi og vera í góðum skóm. Áætlaður göngutími er 4–5 klukkustundir með útsýnishléum. Fararstjóri mun segja frá og vera með fræðslu um jarðfræði og fleira á svæðinu eftir því sem aðstæður leyfa. 

Fyrsti hluti göngunnar er frá Reykjahlíð að Grjótagjá. Þaðan er gengið að Hverfjalli. Gönguleiðin upp á fjallið er eftir aflíðandi stíg. Af fjallinu er stórkostlegt útsýni til allra átta.  Gengið er eftir brúninni að suðurhlið gígsins og niður brattan stíg um fremur lausa sandhlíð, gott að hafa legghlífar meðferðis. Ef einhverjir þátttakendur vilja ekki fara upp á Hverfjall þá er greiðfær gönguleið meðfram fjallinu þar sem hægt er að hitta hópinn þegar hann kemur niður af fjallinu. Næsti hluti ferðarinnar er frá Hverfjalli að Dimmuborgum. Þar er vel afmarkaður stígur í ævintýralegu umhverfi. Þegar komið er inn að miðju Dimmuborga er gengið eftir nýjum malbikuðum stígum. Vegalengd: um 10 km. Gönguhækkun: 150m á Hverfjall.

Skráning