Komdu út og á fjöll

Komdu út og á fjöll - 2023

Upp til fjalla bíða okkar ævintýri og upplifun af ýmsum toga. Ferðafélag Akureyrar verður með skipulagða hópa í fjallgöngum í sumar. Ef þú ert að leita að útivist þar sem gengið er á fjöll og farið á áhugaverða staði á Norðurlandi þá er þetta hópurinn fyrir þig. Farið verður í átta ferðir á tímabilinu 16. maí - 13. júní 2023. Helmingur ferðanna er á virkum dögum (seinni part) og hinn helmingurinn um helgar.

Gönguhópurinn „Komdu út og á fjöll“ hjá FFA er fyrir alla sem eru í þokkalegu gönguformi og miðast erfiðleikastig og gönguhraði ferða við tvo til þrjá skó. Haft verður að leiðarljósi að „njóta en ekki þjóta“. Byrjað verður á lægri fjöllum til að auka þol þátttakenda. Um er að ræða gönguhóp sem haldið verður vel utan um m.a. með öruggri fararstjórn reyndra fararstjóra, facebókarsíðu og góðri upplýsingagjöf.

Ferðirnar verða á þriðjudögum (einn fimmtudagur) kl. 18:00 og laugardögum kl. 09:00 (sunnudagur til vara ef veðurspá er betri þá).

Hér er hægt að sjá dagskrána

Gert er ráð fyrir að ferðir sem farnar verða um helgar verði 5 - 7 tímar með akstri, en á virkum dögum eru ferðirnar styttri, eða 3 - 4 tímar með akstri. Þátttakendur koma á eigin bílum og er upphafsstaður ferða við Ferðafélag Akureyrar, Strandgötu 23.

Umsjón með verkefninu hafa Anna Sigrún Rafnsdóttir og Kristján Hreinsson og eru þau jafnframt fararstjórar í ferðunum. Hugsanlega bætast einhverjir fararstjórar við í ákveðnum ferðum. 
Fyrirspurnum er hægt að beina til Önnu Sigrúnar á netfangið annasr45@gmail.com eða í síma 848 1090. Fyrirspurnir má einnig senda á netfangið formadur@ffa.is.

Skráningu lýkur 12. maí og verkefnið hefst 16. maí. Skráningarhnappur er efst á síðunni.

Lágmarksfjöldi er 12 þátttakendur.

Verð: 28.500 kr. fyrir félaga í FFA eða FÍ, sama verð fyrir maka. Fyrir aðra kostar námskeiðið 33.500 kr. Greiða þarf þegar skráningu lýkur, krafa verður stofnuð í netbanka. Ekki er endurgreitt eftir að verkefni er hafið.

Mikilvægt:

Ekki er endurgreitt eftir að verkefni er hafið.

Í verkefnum og ferðum FFA ferðast þátttakendur á eigin ábyrgð. FFA tryggir hvorki farþega sína né farangur þeirra og hvetur fólk til að kynna sér eigin heimilistryggingar eða kaupa ferða- og slysatryggingu.

Hagstætt er að gerast félagi í FFA. Með félagsskírteini FFA fæst afsláttur í mörgum sportvöruverslunum s.s. Skíðaþjónustunni og Útivist og sport auk afsláttar í ferðir, verkefni og gistingu í skálum, sjá nánar: Gerast félagi í FFA, þar getið þið skráð ykkur í félagið.