Dreki

BÓKA SKÁLANN

Staðsetning: Skálarnir í Dreka standa við Drekagil, austan Dyngjufjalla sem umlykja Öskju. Drekagil er í 8 km akstursfjarlægð frá Vikraborgum, þaðan sem gengið er 2,5 km inn að Víti og Öskjuvatni. Frá Drekagili er 19 km akstur að Holuhrauni.

Lýsing á skála: Við Drekagil á Ferðafélag Akureyrar fimm hús, tvo gistiskála, skálavarðahús, snyrtihús og þjónustuhús. Gistirými er þar fyrir 55 manns; 40 í skálanum Öskju og 15 í Dreka. Í skálunum er olíuupphitun, gashellur og eldhúsáhöld. Á svæðinu er hreinlætisaðstaða og tvær sturtur í snyrtihúsinu. 

Gott tjaldsvæði er við Drekagil með aðgangi að snyrtihúsinu. 

Gæsla: Skálaverðir eru á svæðinu frá miðjum júní fram í september.

Gönguleiðir í umhverfi skálans: Nokkrar stikaðar gönguleiðir eru í í nágrenni skálans. Stutt er í Öskju þar sem eru áhugaverðar gönguleiðir. Útsýnisskífa með öllum helstu örnefnum fjallahringsins var sett upp 2022. Hún er á Föðurnum sem er hóll á hægri hönd rétt áður en komið er úr norðri í Drekagil.

Þjónustuhús: Sumarið 2023 var tekið í notkun þjónustuhús fyrir tjaldgesti, göngu- og hjólafólk auk lausaumferðar. Í húsinu er góð aðstaða fyrir fólk til að borða nesti og þurrka fatnað. Í þjónustuhúsinu er veitingasala yfir sumartímann.

Byggingarsaga: Elsta húsið á svæðinu er Dreki sem var byggður 1968 og hefur verið skálavarsla þar síðan 1986. Árið 2001 var byggt veglegt snyrtihús með sturtum og 2005 var skálinn Askja tekinn í notkun. Nýtt skálavarðahús var byggt 2007 og nefnt Fjólubúð eftir Fjólu Kristínu Helgadóttur sem var skálavörður í Drekagili um árabil. Árið 2019 hófst bygging þjónustuhúss á svæðinu. Það var tekið í fulla notkun sumarið 2023. Þar er veitingasala yfir sumartímann.

Umfjöllum Hringbrautar um Dreka er hægt að sjá hér.

Bóka skálann